कोरोना संक्रमणबाट श्रीमान–श्रीमतीको एकैदिन मृत्यु

कोरोना संक्रमणका कारण इलाममा एकै दिन श्रीमान श्रीमतीको मृत्यु भएको छ ।

माङसेबुङ गाउँपालिका–५ का ७९ वर्षीय टेकबहादुर लावती र उनकी श्रीमती ७३ वर्षीया लक्षीहाङमा लावतीको मृत्यु भएको हो ।

श्रीमान टेकबहादुरको बिहीबार बिहान र श्रीमती लक्षीहाङमाको दिउँसो साढे ३ बजे निधन भएको हो । 

लावती परिवारका सात जनामा कोरोना सङ्क्रमण पुष्टि भएकामा दुई जनाको निधन भएको हो ।

एकै परिवारका दुईको निधन भएसँगै गाउँमा त्रास फैलिएको छ । स्थानीय रेडियो माङ्सेबुङका स्टेशन मेनेजर रहेका छोरा सुमन लावतीसमेत भाइरस संक्रमणका कारण होमआइसोलेशनमा छन् ।

६ दिनअघि उनीहरूलाई संक्रमण पुष्टि भएको थियो । संक्रमित दुबैजना होमआइसोलेशनमा थिए । 

मृतक दम्पतीका दुई छोरा, एक बुहारी र दुई नाति कोरोना संक्रमित रहेको बताइएको छ । परिवारका अन्य सदस्यको अवस्था भने सामान्य रहेको बताइएको छ ।