नयाँ दिल्ली
भारतको प्रमुख मिडिया समूह दैनिक भास्करको कार्यालयहरूमा आयकर विभागले छापा हानेको छ । दैनिक भास्कर हिन्दीको प्रमुख अखबारमध्ये एक हो ।
सेन्ट्रल बोर्ड अफ डाइरेक्ट ट्याक्सेज (सिबिडिटी) का प्रवक्ता सुरभि आहलुवालियाले भास्करको कार्यालयमा आयकर विभागले छापा हानेको पुष्टि गरेको छ ।
यद्यपि भास्करको कार्यालयमा छापा हानिएको कारणबारे उनले बताएका छैनन् ।
छापामारीबारे केन्द्रीय सूचना एवं प्रसारणमन्त्री अनुराग ठाकुरले एजेन्सी आफ्नो काम गरिरहेको र यसमा सरकारको हस्तक्षेप नरहेको बताएका छन् ।
आयकर विभागको टोलीले दैनिक भास्करको विभिन्न राज्यस्थि कार्यालयमा पनि छापा हानेको बताइएको छ ।
भास्करको भोपालस्थि मुख्यालय र प्रकाशकको घरमा समेत आयकर विभागको टोलीले छापामारी गरेको छ ।
दैनिक भास्कारका कर्मचारीहरूका अनुसार उनीहरूका मोबाइल नियन्त्रणमा लिइएको छ ।
छापामारीका कारणबारे केही नखोलाइएको दैनिक भास्करका सम्पादक लक्ष्मीप्रसाद पन्तले बताएका छन् ।
दैनिक भास्करले आफ्नो वेबसाइटमा एक रिपोर्ट प्रकाशित गरेर सत्य पत्रकारिकताबाट सरकार डराएको बताएको छ ।
गंगा नदीमा शव बगाइनुका साथै कोरोनाका कारण मृत्यु हुनेको यथार्थ तथ्यांक सार्वजनिक गरेकोले सरकार अंकुश लगाउन खोजेको उसले जनाएको छ ।
सम्पादक पन्तले सत्य खबर प्रकाशित गर्दा सरकारलाई असहज भएपछि छापामारीको बहानामा दुःख दिन खोजिएको बताए ।
दैनिक भास्करका साथै भारत समाचारमा पनि छापा हानिएको छ ।
उत्तर प्रदेशबाट सञ्चालित समाचार च्यानल भारत समाचार र सम्पादक ब्रजेश मिश्राको घरमा पनि आयकर विभागले छापा हानेको छ ।
सञ्चार माध्यममा सरकारले छापामारी गरेपछि त्यहाँका विपक्षी दलहरूले आपत्ति जनाएको छ ।
प्रतिक्रिया