तनहुँ : आँबुखैरेनी गाउँपालिका-४ मुग्लिङ पुल जिपस्थित सडकबाट १० केजी २ सय २० ग्राम अबैध लागूऔषध गाँजा सहित कास्की रुपा गाउँपालिका-७ घर भई पोखरा महानगरपालिका-३२ लेखनाथ बस्ने २८ वर्षीय सुमन परियार समेत २ जनालाई बिहीबार राति प्रहरीले पक्राउ गरेको छ । मुग्लिङबाट आँबुखैरेनीतर्फ आउँदै गरेको ना.१६ प ८२६८ नम्बरको मोटरसाइकललाई जिल्ला प्रहरी कार्यालय र ईलाका प्रहरी कार्यालय आबुँखैरेनीबाट खटिएको प्रहरीले जाँच गर्दा उक्त परिमाणको गाँजा सहित फेला पारी मोटरसाइकलमा सवार उनीहरुलाई पक्राउ गरेको हो ।
त्यसैगरी कैलाली, टिकापुर नगरपालिका-८ सत्ती पुलस्थित सडकबाट ३० ग्राम ३ मिलिग्राम अबैध लागूऔषध चरेस जस्तो देखिने पदार्थ सहित २ जनालाई बिहीबार साँझ प्रहरीले पक्राउ गरेको छ । पक्राउ पर्नेहरूमा सोही नगरपालिका-१ बस्ने १९ वर्षिय राहुल रावल र बर्दिया गेरुवा गाउँपालिका-४ कटेजपुर बस्ने १९ वर्षीय जनक धामी रहेका छन् । से.७ प १३३८ नम्बरको स्कुटरलाई प्रहरी चौकी सत्तीबाट खटिएको प्रहरीले जाँचको गर्ने क्रममा उक्त पदार्थ सहित फेला पारी स्कुटर चालक धामी र स्कुटरमा सवार रावललाई पक्राउ गरेको हो ।
त्यसैगरी धनुषा, धनौजी गाउँपालिका-३ कटैयाचोकबाट ३४ पिस नियन्त्रित लागूऔषध डाईलेक्स डिसि बिहीबार साँझ प्रहरीले बरामद गरेको छ । प्रहरी चौकी धनौजीबाट खटीएको गस्ती टोलीलाई देख्नासाथ अनटेष्ट लेखिएको मोटरसाइकल छाडी चालक फरार भएपश्चात मोटरसाइकलमा रहेको झोलाभित्र उक्त लागूऔषध फेला पारी प्रहरीले बरामद गरेको हो । फरार चालकको प्रहरीले खोजी गरिरहेको छ ।
यस सम्बन्धमा थप आवश्यक अनुुुसन्धान गरिरहेको प्रहरीले जनाएको छ ।
प्रतिक्रिया