भारतीयको कुटपिटबाट मृत्यु भएका परिवारलाई आर्थिक सहयोग

सप्तरीको डाक्नेश्वरी नगरपालिकाले कुटाइबाट मृत्यु भएका परिवारलाई नगदसहित आर्थिक सहयोग प्रदान गरेको छ ।

नगरपालिकाको वडा नं ६ कटैया गाउँमा भारतीय सिमानामा खेतमा बाली खाएको विषयमा झगडा हुँदा भारतीयको कुटपिटका कारण स्थानीय रामदेव यादवको तीन महिना अगाडि मृत्यु भएको थियो ।मृतक यादवकी श्रीमतीलाई नगरपालिकाका उपप्रमुख इन्दुदेवी यादवले आर्थिक सहयोगस्वरूप तत्काल रु ५१ हजारको चेक हस्तान्तरण गरिन् ।

श्रीमान्को मृत्यु भएपछि उक्त परिवारले कष्टकर जीवन यापन गर्दै आएको थियो । घरपरिवारलाई गुजारा गर्न समस्या भइरहेको अवस्थामा नगरपालिकाले आर्थिक सहयोग गरेको स्थानिय महेन्द्र सदाले जानकारी दिए ।