सनराइजको वित्तीय साक्षरता अभियान: “समृद्धि सँग जोडौँ नाता,सबै नेपालीको बैंक खाता”
  • सञ्जय आचार्य
  • सोमवार, जेष्ठ २७, २०७६
  • पोखरा

सनराइज बैंक लि. को आयोजना तथा रुपा गाउँपालिका र स्कूल अफ विजनेस, पोखरा विश्वविद्यालयको सहकार्यमा रुपा गाउँपालिका वडा नं. २, थुम्कीको करिव तीन सय घरहरुमा खोलौं बैंक खाता अभियान संचालन गरिएको हो।

नेपाल सरकारको ‘समृद्धिसँग जोडौं नाता, सबै नेपालीको बैंक खाता’ अभियान कार्यक्रमलाई सफल बनाउन कार्यक्रम संचालन गरिएको बैंकले जनाएको छ। रुपा गाउँपालिकाका अध्यक्ष नवराज ओझा एवं स्कूल अफ विजनेस, पोखरा विश्वविद्यालयका प्रमुख डा. रबिन्द्र घिमिरेले संयुक्त रुपमा सो कार्यक्रमको सुरुवात गरेका हुन।

कार्यक्रममा प्रमुख बक्ताको रुपमा बोल्दै नवराज ओझाले ग्रामिण क्षेत्रलाई समेत बैंकिङ सेवा सुविधा प्रदान गर्न बैंकको शाखा सो गाउँपालिकामा स्थापना भएकोमा यसलाई अवसरको रुपमा लिनुपर्ने बताए।

प्रमुख ओझाले घरमा निस्क्रिय रुपमा रहेको सानो सानो बचत रकमलाई समेत बैंकमा जम्मा गर्दा हुने बचतको वानि एवं आवश्यकता अनुसार साना, घरेलु एवं कृषि, पशुपालन व्यवसायहरुलाई व्यवसायिक रुपमा संचालन गर्न बैंकिङ सहयोग मार्फत आर्थिक उन्नती गरी समृद्धिको ढोका खोल्न सकिने बताए।

कार्यक्रममा डा. रबिन्द्र घिमिरेले, पोखरा विश्वविद्यालयका विद्यार्थीहरुलाई समेत ग्रामीण क्षेत्रको आर्थिक अवस्था बारेमा व्यवहारिक ज्ञान उपलब्ध हुने अवसरको रुपमा नेपाल सरकारको अभियानमा सहभागी भएको भनाई व्यक्त गरे।

उक्त कार्यक्रममा रुपा गाउँपालिका उपाध्यक्ष श्रीमती लाल सुभा गुरुङ कार्यालयका कार्यकारी अधिकृत विष्णु प्रसाद पोखरेल, वडा नं. २ का कार्यवाहक अध्यक्ष हिता कूमारी रुपाखेती समेतले आफ्नो भनाई एवं कार्यक्रम सफलताको शुभकामना राखेका थिए।

कार्यक्रमलाई समापन गर्दै सनराईज बैंक लि. गण्डकी प्रदेशका प्रादेशिक प्रमुख रबिन्द्र के.सी.ले बैंकले नेपाल सरकारले लिएको अभियानलाई सफल बनाउनको लागि ग्रामीण क्षेत्रमा निरन्तर रुपमा सेवा दिई राखेको एवं सबै नेपालीको बैंक खाताको लागि यस गाउँपालिकाका अन्य वडाहरुमा समेत यो कार्यक्रमलाई निरन्तर रुपमा संचालन गरिने जानकारी गराए। साथै सबै जनप्रतिनिधी एवं स्थानीय समाजसेवीहरु लाई सहयोग गर्नका लागि समेत उनले अनुरोध गरे।

कार्यक्रममा बैंकका कर्मचारी, स्थानीइ समाजसेवी एवं पोखरा विश्वविद्यालयका विद्यार्थी गरी करिव ७० जना व्यक्तिहरु सबैं घरघरमा गई वित्तीय सांक्षरता एवं बैंक खाता खोल्ने अभियान संचालन गरिएको थियो।