ओली सरकारलाई व्यवसायीको चेतावनी : थप सोच्न नपरोस
  • अनलाइनपाना संवाददाता
  • शनिबार, साउन ४, २०७६
  • काठमाडौँ

नेपाल राष्ट्रिय व्यवसायी महासंघले सरकारलाई चेतावनीसहित आफ्नो निर्णय कार्यान्वयन गर्न आग्रह गरेको छ । महासंघ अध्यक्ष नरेश कटुवालले शनिबार विज्ञप्ती जारी गर्दै साउन १ देखि शुरु भएको भेइकल कन्साइमेन्ट ट्रयाकिङ सिस्टम तत्काल अनिवार्य नगर्न आग्रह गरेका छन् ।

महासंघले एक वर्ष परीक्षणको रुपमा उक्त सिस्टम लागू गर्न आग्रह गरे पनि सरकारले बेवास्ता गरेको भन्दै शनिबार विज्ञप्ती जारी गर्दै सरकारको ध्यानाकर्षण गरिएको हो । आफ्ना माग पुरा नभए थप सोच्न बाध्य हुने भन्दै महासंघले कडा आन्दोलनको संकेत समेत गरेको छ ।

यस अघि शुक्रबार काठमाडौंको न्यूरोडमा महासंघले प्रदर्शन गरेको थियो । नयाँ आर्थिक वर्षको शुरुवातसँगै राजश्व अनुसनधान विभागले शुरु गरेको भेइकल ट्रयाकिङ सिस्टम एक वर्षलाई परीक्षणको रुपमा लागु गर्नु पर्ने माग गर्दै आएको महासंघले आफ्नो भनाई सरकारले नसुनेको भन्दै शुक्रबार प्रदर्शन गरेको हो ।

महासंघले यस अघि पनि विज्ञप्ती जारी गर्दै केहि समय परीक्षणको रुपमा काम गर्नु पर्ने बताएको थियो । तर साउन १ गते प्रधानमन्त्री तथा मन्त्रिपरिषद्को कार्यालयमा आयोजित एक कार्यक्रमकाबीच अर्थमन्त्री डा. युवराज खतिवडाले उक्त सिस्टमको उद्घाटन गरेका थिए ।

राजश्व अनुसन्धान विभागले ३ महिनाको अवधिभरलाई परीक्षणको अवधि मान्ने बताएको छ । तर व्यवसायीहरुले भने परीक्षणको अवधि एक वर्ष हुनु पर्ने माग राख्दै आएका छन् । सरकारले ल्याएको नीतिलाई आफूहरुले स्वीकार गर्ने भए पनि परीक्षणको अवधि एकदमै थोरै भएको महासंघका अध्यक्ष कटुवालले बताए । महासंघ अध्यक्ष कटुवालले भने, ‘सरकारको नीति आउनै हुँदैन भनेको होइन, कमसेकम हामीलाई सिक्ने अवधि त चाहिँयो नि ।’

अहिले मुलुकमा साक्षरताको अवस्था नै निकै कमजोर रहेको अझ प्रविधिमा त कमै मात्रै नागरिकको पहुँच पुगेको भन्दै उनले पहिले नसिकाई एक्कासी लागू गर्न नहुने बताए । धेरै व्यवसायीहरुको पहुँचमा कम्प्युटर र इन्टरनेटको पहुँच पुग्न अझै केहि समय लाग्ने भन्दै उनले कम्तिमा पनि एक वर्षको अवधि सरकारले दिनु पर्ने उनले बताए । सरकारले शुरु गरेको भेइकल ट्रयाकिङ सिस्टम तत्कालै अनिवार्य नगर्न अन्य संघ–संगठनहरुले पनि माग गर्दै आएका छन् । विभागले उक्त सिस्टमका लागि नयाँ सफ्टवेयर बनाएर कार्यान्वयन शुरु गरेको थियो ।

यो पनि पढ्नुहोस्

सरकारविरुद्ध राष्ट्रिय व्यवसायी महासंघ ‘भेल’ उत्रियो, आत्तियो ओली सरकार

अनलाइनपाना टिभीका भिडियो पनि हेर्नुहोस्