कोभिडको विश्वव्यापी आतंकपछि भर्चुअल कक्षा, भर्चुअल बैठक, भर्चुअल भाषण, भर्चुअल भेटघाट सामान्यीकरण बन्दै गएको सन्दर्भमा पाँच वर्ष पहिले काठमाडौंस्थित ईश्वर मन्दिर संस्थाले सामुदायिक विद्यालयमा ई लर्निङ अभियान थालेको हो । यसको पूर्वाभ्यास भोजपुरका ६ वटा र सिन्धुपाल्चोकको एउटा विद्यालयमा गरिएका छन् ।
पहिलो चरणमा भोजपुर नगरपालिकास्थित विद्योदय माध्यमिक विद्यालय, सरस्वती आधारभूत विद्यालय, अरुण गाउँपालिकामा रहेको शारदा माध्यमिक विद्यालयमा ई लर्निङका लागि आवश्यक सामग्री हस्तान्तरण गरिएको थियो । विद्योदय माध्यमिक विद्यालयमा २० थान कम्प्युटर, स्मार्ट टीभी, ल्यापटप र प्रोजेक्टर प्रदान गरिएको छ । सात दशकअघि ०७ सालको क्रान्तिपश्चता स्थापना भएको यो विद्यालयमा वर्तमान राष्ट्रपति विद्यादेवी भण्डारी पढेकी थिइन् ।
वर्षेनी नयाँ नयाँ विद्यालय छान्ने क्रममा अघिल्लो वर्ष जिल्लाकै सुदूर दक्षिणको सगरमाथा माध्यमिक विद्यालयमा ई लर्निङ सेन्टर स्थापना गरिएको थियो । कोभिडका कारण यो वर्ष भोजपुर बजारमा रहेको जनसेवा आधारभूत विद्यालय ई लर्निङका लागि छनोटमा परेको छ । संस्थाका संरक्षक तथा सल्लाहकार पूर्वअर्थमन्त्री शंकरप्रसाद कोइराला, अध्यक्ष प्रमेश केसी, भोजपुर नगरका मेयर कैलाश आलेले संयुक्त रुपमा आवश्यक सामग्री हस्तान्तरण गरे ।
हस्तान्तरण कार्यक्रमलाई सम्बोधन गर्दै पूर्वअर्थमन्त्री कोइरालाले यो अभियान देशव्यापी बनाइने बताए । कोभिडका कारण केही शिथिल भएको भन्दै कोइरालाले हिमाल र तराईमा अभियानका रुपमा विस्तार गरिने जानकारी दिए । ‘देशकै शैक्षिक र प्राज्ञिक गरिमा बोकेको दिङ्लामा अर्को वर्ष प्रभावकारी ई लर्निङ सेन्टर स्थापना गरिनेछ ।’ कोइरालाले भने ।
नगरप्रमुख कैलाश आलेले प्राज्ञिक क्षेत्रमा नगरपालिकाले संस्थासंग सहकार्य गर्ने प्रतिवद्धता जनाए । संस्थाका अध्यक्ष प्रमेश केसीले सूचना प्रविधिको पहुँचविना अबको जनशक्तिले प्रतिस्पर्धा गर्न नसक्ने भएकाले प्रत्येक विद्यालय व्यवस्थापकको ध्यान यसतर्फ केन्द्रित हुनुपर्ने बताए । उनले देश विदेशका सक्षम जनशक्तिबाट कक्षा लिने पद्दतिको विकास छिटै गरिने जानकारी दिए ।
यसैबीच भोजपुरमा रहेको दुई सामुदायिक विद्यालयमा पूर्व अर्थमन्त्री शंकरप्रसाद कोइरालाले छात्रबृति प्रदान गरेका छन । सदरमुकामको विद्योदय माध्यमिक विद्यालय र सरस्वती आधारभूत विद्यालयमा स्थापना भएको अक्षय कोषको ब्याजबाट छात्रबृति रकम बितरण गरिएको हो ।
पूर्वअथमन्त्रीले २०७१ सालमा वेदनीधि धनकुमारी कोइराला छात्रवृत्ति कोष नाममा विद्योदयमा ५ लाख र सरस्वती आधारभूत विद्यालयमा ३ लाखको अक्षय कोष स्थापना गरेका थिए । विद्योदयमा स्थापना भएको अक्षयकोषको ब्याज बरावरको १ लाख १९ हजार ४ सय रकमबाट कक्षा १२ मा अध्ययनरत अस्मिता राई १७ हजार, कक्षा ११ का विशाल राई १७ हजार र ११ कै अभिषेक राईलाई १७ हजार छात्रबृति प्रदान गरिएको छ ।
यसैगरी कक्षा ८ उतीर्ण गर्ने बिनु भुजेल, देवराज चौलागाई, समिक्षा भण्डारी बिपिन तिवारी र लक्ष्मी श्रेष्ठलाई जनही १२ हजारका दरले छात्रबृति दिइएको थियो ।
पूर्वअर्थमन्त्री कोइरालाले सरस्वती आधारभूत विद्यालयमा कक्षा ५ अध्ययनरत छात्रा श्रीतु भुजेल र छात्र सुमन बिष्टलाई समेत जनही नगद ६ हजार ३० रुपैयाँ छात्रबृति दिएका छन । दुवै विद्यालयले छनौट गरेका विद्यार्थीहरुलाई अक्षयकोषमा भएको ब्याजबाट छात्रबृति वितरण गरिएको हो ।
सो अवसरमा संस्थाले विभिन्न विद्यालय, पत्रकार, प्रहरी, वायुसेवाका कर्मचारीलाई पाँच हजार थान मास्क बाँडेको थियो ।
यहाँ भिडियो हेर्नुहोस् :