नापी कार्यालय वीरगञ्ज, पर्सामा कार्यरत सर्भेक्षक रामप्रमोद राउत र कार्यालय सहयोगी अरुणप्रसाद उपाध्याय रु एक लाख घुससहित पक्राउ परेका छन् ।
छुट जग्गा दर्ता गरिदिने भन्दै सेवाग्राहीसँग घुस मागिएको सूचनाका आधारमा अख्तियार दुरुपयोग अनुसन्धान आयोग, टङ्गालबाट खटिएको टोलीले उनीहरूलाई रङ्गेहात नियन्त्रणमा लिएको हो ।
आयोगका प्रवक्ता राजेन्द्रकुमार पौडेलका अनुसार राउत र उपाध्यायले सेवाग्राहीसँग विभिन्न बहानामा रु एक लाख घुस मागी लिइसकेको अवस्थामा पक्राउ गरिएको हो ।
उनीहरूलाई वीरगञ्ज महानगरपालिका–३, आदर्शनगर पानी ट्याङ्कीस्थित नापी कार्यालय पर्सा–१, २, ३ नं नापी टोलीको कार्यालय परिसरबाट नियन्त्रणमा लिएको बताइएको छ ।
अख्तियारले उक्त घटनाबारे थप अनुसन्धान अघि बढाएको छ । पक्राउ परेका दुवै कर्मचारीमाथि आवश्यक कानुनी प्रक्रिया अघि बढाइने आयोगले जनाएको छ ।
प्रतिक्रिया