काठमाडौँ । युवापुस्ताका चर्चित गायक सज्जनराज वैद्य दशरथ रङ्गशालामा गुन्जिने भएका छन् ।
युवा पुस्ताका चर्चित गायक वैद्यले माघ २ गते राष्ट्रिय लिग फुटबल प्रतियोगिताअन्तर्गत हुने मच्छिन्द्र र एनआरएटी क्लबबिचको खेलअघि प्रस्तुति दिने भएका हुन् ।
लामो समयपछि वैद्यले काठमाडौँमा प्रस्तुति दिन लागेका हुन् । उनले आफ्ना चर्चित गीत त्यहाँ प्रस्तुत गर्ने जनाइएको छ ।
वैद्य नेपाली गायक, गीतकार, गिटार वादक हुन् । उनले सन् २०१४ मा आफ्नो पहिलो गीत आज मात्र निकालेका थिए । २०१६ मा हवाईजहाज, २०१८ मा चिठीभित्र निकालेपछि उनी प्रख्यात भएका थिए ।
‘हतारिँदै, बतासिँदै’ उनको सबैभन्दा चलेको गीत हो । ‘बराली लग्यो यो हावाले’, ‘फुत्की जाने जोवन’लगायतका उनका चर्चित गीत हुन् ।
सो प्रतियोगिताको लाइभ स्ट्रिम एमएसएम भिडियो एपबाट हुने छ । यो एपमार्फत प्रतियोगितालाई नेपालमा हेर्न ३ महिनासम्म ८९९ रुपैयाँ र विदेशमा तीन महिनासम्म १५ अमेरिकी डलर तोकिएको छ ।
प्रतिक्रिया