नेपाली कांग्रेसको आयोजनामा सरकार गठनका लागि आज बसेको प्रमुख तीन दलको बैठकमा नेपाली कांग्रेसले आफ्नो नेतृत्वमा सरकार बनाउने औपचारिक प्रस्ताव राख्दै सहयोगका लागि अन्य दलसँग आग्रह गरेको छ ।
कांग्रेस सभापति शेरबहादुर देउवाको निवास बुढानिलकण्ठमा आज बसेको बैठकमा कांग्रेस सभापति शेरबहादुर देउवाले सरकार गठनका लागि कांग्रेसले गरेको निर्णयबारे जानकारी गराउँदै सहयोगका लागि आग्रह गरेका थिए । बैठकको सुरुमैँ सभापति देउवाले प्रधानमन्त्री केपी शर्मा ओली सर्वसत्तावाद उन्मुख भएको भन्दै नयाँ सरकार बनाउनुपर्ने बताएका थिए ।
बैठकपछि नेपाली कांग्रेसका प्रवक्ता विश्वप्रकाश शर्माले भने –‘नयाँ सरकार गठनका लागि भएको औपचारिक बैठक हो । कांग्रेसको बैठकले नयाँ सरकार बनाउन अग्रसरता लिने र यसका लागि पहल गर्ने भनेर निर्णय गरेका छौँ । आजको बैठकमा औपचारिक रुपमा प्रस्ताव राख्छौँ । यो प्रस्तावउपर राख्ने धारणापछि अघि बढौँ, भन्नुभयो । यसमा नेकपा माअोवादीले हामी सरकार गठनमा सुरुवात देखि नै प्रष्ट छौँ भन्ने कुरा आयो । जसपाबाट महन्थ ठाकुर, उपेन्द्र यादवले औपचारिक रुपमा बल्ल प्रस्ताव आएको छ । विधिवत बैठक बसेर निष्कर्ष निकाल्छौँ भन्नुभयो । अब अर्को बैठक बसेर थप निर्णय गर्ने कुरा भयो ।’
बैठकमा नेकपा माअोवादी केन्द्रले सत्ता समीकरणका लागि आफूहरु सकारात्मक भएको जानकारी गराएको थियो । बैठकपछि माओवादी केन्द्रका प्रवक्ता नारायणकाजी श्रेष्ठले भने –‘ जसपाले हामीले औपचारिक रुपमा छलफल गरेर निर्णय लिएका छैनौँ । छिट्टै छलफल गर्छौँ र निर्णय लिन्छौँ । आन्दोलनमा चलेका मुद्धा फिर्ता मन्त्री रिहा लगायतका विषय पनि छन भन्ने कुरा राखेको छ । जसपाले यसबारे आवश्यक छलफल र निर्णय गरेर फेरि बस्ने भन्ने भयो । ’
बैठकमा नेपाली कांग्रेसका तर्फबाट सभापति देउवा, वरिष्ठ नेता रामचन्द्र पौडेललगायत नेताहरु सहभागी थिए । नेकपा माओवादी केन्द्रबाट अध्यक्ष पुष्पकमल दाहाल प्रचण्ड, नेताहरु नारायण अध्यक्षद्वय महन्थ ठाकुर र उपेन्द्र यादव, वरिष्ठ नेताहरु राजेन्द्र महतो र अशोक राई सहभागी थिए ।
नेपाली कांग्रेसले गत चैत्र २० गते केन्द्रीय समिति बैठकबाट प्रधानमन्त्रीको राजीनामा माग गरेर आफ्नै नेतृत्वमा सरकार बनाउने निर्णय गरेको थियो ।
प्रतिक्रिया