संसद विघटनविरुद्धका रिटमा आजदेखि प्रारम्भिक सुनुवाइ

प्रतिनिधिसभा विघटनविरुद्ध परेका रिटमा आज बिहीबारदेखि प्रारम्भिक सुनुवाइ हुने भएको छ।

सर्वोच्च अदालतका अनुसार, संवैधानिक इजलासमा नपरेका निवेदनमा बिहीबार सुनुवाइ हुनेछ भने संवैधानिक इजलासमा सुनुवाइ माग गरेका निवेदनमाथि शुक्रबार संवैधानिक इजलासमा नै सुनुवाइ हुनेछ। विघटनविरुद्ध ३० वटा रिट दायर भएकामा १९ वटामा बिहीबार  प्रारम्भिक सुनुवाइ हुन लागेकाे हाे। 

सर्वोच्चले बिहीबार एकल इजलासमा सुनुवाइ गर्नेछ । प्रधानन्यायाधीशले आफू वा जोकोही एकजना न्यायाधीशका लागि तोक्न सक्नेछन् । सांसदहरुले सोझै संवैधानिक इजलासमा निवेदन दिएकाले उनीहरुको निवेदनमाथि शुक्रबार सुनुवाइ हुनेछ । शुक्रबारको सुनुवाइ भने ५ सदस्यीय संवैधानिक इजलासमा नै हुनेछ। 

गत सोमबार ५ पूर्वप्रधानमन्त्रीसहितका १४६ सांसदले सर्वोच्च अदालतमै उपस्थित भएर संसद विघटनको निर्णयविरुद्ध रिट दायर गरेका थिए। उनीहरुले प्रस्ट बहुमतसहित शेरबहादुर देउवालाई प्रधानमन्त्रीमा नियुक्त गर्न माग गरे पनि राष्ट्रपतिले दाबी नपुगेको भन्दै अस्वीकृत गरेकी थिइन्।

त्यसलगत्तै ७६९३० को कामचलाउ हैसियतमा रहेका प्रधानमन्त्री केपी ओलीको सिफारिसमा राष्ट्रपतिले संसद विघटन गरेकी थिइन्।

यसअघि गत पुस ५ मा पनि सरकारको सिफारिसमा उनले संसद् विघटन गरेकी थिइन्। तर सर्वोच्च अदालतले फागुन ११ गते संसद पुनर्स्थापनाको फैसला गरेको थियो।

तीन महिना नबित्दै फेरि सर्वोच्चमा संसद् विघटनको मुद्दा परेको हो।