गणतन्त्र दिवसमा भीम रावलको कविता – राष्ट्रलाई नाश्‍ने गलेर नाश हुन्छ !

१४ औं गणतन्त्र दिवस मनाइँदरहँदा मुलुक अहिले राजनीतिक संकट निम्तिएको छ । गणतन्त्रका लागि नेकपा एमालेबाट सडक आन्दोलनमा होमिएका नेता भीम रावललाई अहिले पार्टीबाट नै निष्कासन गरिएको छ । यही अवस्थामा उनले गणतन्त्र दिवसको शुभकामना व्यक्त गर्दै कविता लेखेका छन् । ट्विटरमा कविता शेयर गर्दै भनेका छन्, “गणतन्त्र दिवसले राष्ट्रिय स्वाधीनता, स्वाभिमान र समृध्दिका तगारा हटाउने काममा लाग्न सबैलाई प्रेरित गरोस् । हार्दिक शुभकामना ! मनपरीतन्त्र, निरंकुशतन्त्र, विधेयकतन्त्र, लम्पसारतन्त्र, कमिशनतन्त्र र राष्ट्रघाततन्त्रबाट देशले मुक्ति पाओस् ।

नेता रावलको कविता :

राष्ट्रलाई नाश्‍ने गलेर नाश हुन्छ !

अस्त र व्यस्त समाजै त्रस्त रमाउँछौ यसैमा 
बेथिति अति बिगारेउ मति संकट ल्याइ यो देशमा, 
भय र त्रास फैलाई यहाँ सबैलाई तर्साउँछौ 
न्यायका हकी देशभक्तमाथि शब्दवाण वर्षाउँछौ ।

षड्‌यन्‍त्र जाल बुनिन्छन तिम्रा सामन्त साथमा 
अधिकार छिन्छौ विधिलाई मिच्छौ अँधेरी रातमा, 
अतृप्त तिम्रो सत्ताको भोक कहिले हो मेटिने 
स्वाधीनतासंगै स्वाभिमान भन्ने कहाँ हो भेटिने ?

विधि र विधान नैतिकता तिमीले के साह्रो मिचेको
कुर्सीको खेलमा स्वार्थको झेलमा चुर्लुम्मै डुबेको, 
नक्कली कुरा फैलाई सधैं नठान टिकिन्छ 
जनाधिकार मास्‍ने, राष्ट्रलाई नाश्ने गलेर नाश हुन्छ ।

जेठ १५, २०७८ ।