जनता समाजवादी पार्टी नेपाल (जसपा) नेपालको विवाद बढ्दै गएर औपचारिक फुटको घोषणा हुन मात्र बाँकी छ । बिहीबर उपेन्द्र यादवले समूहले बोलाएको पार्टीको कार्यकारिणी समितिको बैठक बस्दै गर्दा पार्टीका अर्का अध्यक्ष महन्थ ठाकुर समूह भने निर्वाचन आयोग पुगेको छ ।
उनले बुधबार थप गरेका २० जना कार्यकारिणी समिति सदस्यको नामावली निर्वाचन आयोगलाई बुझाएका छन् । कार्यकारिणी समितिमा अल्पमतमा परेपछि अध्यक्ष ठाकुरले आफ्ना पक्षबाट २० जना सदस्य थपेका हुन् । जेठ ३० गते ठाकुरले आफूपक्षीय बैठक राखेर २० जनाको नाम थपेका थिए । थपिएका नाम दर्ता किताबमा अध्यावधिकका लागि असार १ गते उनले आयोगमा दर्ता गराएको उनीपक्षीय एक नेताले बताए । दर्ता गराउनका लागि केशव झा निर्वाचन आयोग पुगेका थिए ।
जेठ ३० गते नै आयोगले दुबै पक्षले गरेका कारबाहीका निर्णयहरु अस्वीकार गर्दै दुबै अध्यक्ष रहेको पार्टी नै आधिकारिक भएको बताएको थियो । तर, ठाकुरले २० जनाको नाम थपेर आयोगमा अध्यावधिकका लागि पठाएका हुन् । निर्वाचन आयोगले त्यसलाई दर्ता गरेपनि थप निर्णय भने लिइसकेको छैन ।
थप गरिएका २० जनामध्ये सबैजना महन्थ ठाकुर र राजेन्द्र महतो पक्षका हुन् । त्यसमा शरतसिंह भण्डारी, राजकिशोर यादव र अनिलकुमार झाका पक्षका नेतालाई नराखिएपछि असन्तुष्टि समेत देखिएको छ ।
कार्यकारिणी समितिमा बाबुलाल साह, विजय गुप्ता, अर्जुन उप्रेती, अरविन्द साह, जयप्रकाश ठाकुर, उपेन्द्र महतो, मुकेश झा, शतरजित यादव, एकवाल मियाँ, रमेश पटेल, विमल श्रीवास्तव, उमाशंकर अरगरिया, सन्तोष मेहता, डा.विजय सिंह, कृष्ण सिंह, परमेश्वर साह, अभिराम शर्मा, राजिव झा, सुरेश मण्डल र डा.सुरेन्द्र झाको नाम थप गरिएको हो ।
उपेन्द्र यादव समूहले सरकारमा सहभागी भएकाहरुलाईबाहेक ४३ जनालाई बैठकमा सहभागी हुन आह्वान गरेका छन् । तर, महन्थ समूहले भने उक्त बैठक अवैधानिक र अनधिकृत भएको जनाएको छ । जसपाबाट अहिले ११ जना प्रधानमन्त्री केपी शर्मा ओली नेतृत्वको सरकारमा सहभागी भएका छन् ।
प्रतिक्रिया