कर्णाली प्रदेश सरकारमा रहेका एमालेबाट मन्त्री बनेका तीन जनालाई पार्टीले सरकार छोड्न निर्देशन दिएको छ । एमाले कर्णाली प्रदेश संसदीय दलले बिहीबार तीनै नेतालाई निर्देशन दिएको हो ।
पार्टीको ह्वीप उल्लंघन गर्दै माओवादी नेतृत्वलाई सघाएपछि मन्त्री बनेका अम्मरबहादुर थापा, कुर्मराज शाही र नन्दसिंह बुढालाई एमाले कर्णाली प्रदेश संसदीय दलले सरकार छाड्न निर्देशन दिएको छ ।
तीन मन्त्री अर्का नेता प्रकाश ज्वालाले एमाले संसदीय दलको ह्वीप उल्लंघन गर्दै माओवादी नेता महेन्द्रबहादुर शाहीको पक्षमा विश्वासको मत दिएका थिए । त्यसपछि एमालेले उनीहरूलाई कारबाही गरेको थियो । एमालेको कारबाहीसँगै उनीहरूको सांसद पदसमेत खारेज भएको थियो । तर, सर्वोच्च अदालतले चारैजनाको सांसद पद पुनःबहाली गरिदिएपछि एमाले संसदीय दलले फेरि उनीहरूलाई सरकार छाड्न भनेको हो ।
अहिले कर्णाली प्रदेशमा सरकारमा पनि एमाले र विपक्षमा पनि एमाले रहेको अनौठो दृश्य देखिएको छ । एमालेको केन्द्रमा देखिएको विवाद प्रभाव कर्णाली प्रदेशमा पनि परेको हो । मावध समूहका ४ जनाले फ्लोर क्रस गरेका थिए । त्यसपछि तीनजना मन्त्री बनेका थिए ।
माधव नेपाल पक्ष केन्द्रदेखि तल्लो तहसम्म पार्टी भित्रै प्रतिपक्षको भूमिकामा जस्तो रहेकाले उनीहरूले राजीनामा दिने सम्भावना भने एकदमै कम छ ।
प्रतिक्रिया