ओलीलाई व्यंग्य गर्दै नेपालले भने – महाराजधिराजले आममाफी दिने रे, हामी गद्‍गद् भयौँ

नेकपा एमालेका पार्टी अध्यक्ष केपी शर्मा ओली गल्ती गर्नेलाई उन्मुक्ति दिने प्रतिकृया दिएसँगै वरिष्ठ नेता माधवकुमार नेपालले आफूहरु खुसी भएर नाच्नुपर्ने अवस्था आएको भन्दै ओलीमाथि व्यंग्य गरेका छन् ।

उनले भने, “श्री पाँच महाराधिराज सरकारले आफूहरुलाई ‘आममाफी’ दिने रे। वा वा ।  हामी गद्‌गद् भयौँ । अब नाच्नुपर्ने भयो ।”

४३ औँ पुष्पलाल स्मृति दिवसको उपलक्ष्यमा ललितपुरको च्यासलमा शुक्रबार आयोजित नेपाली कम्युनिष्ट आन्दोलनको वर्तमान संकट र आगामी बाटो विषयमा प्रवचन कार्यक्रममा उनले ओलीले आफूले गलत गरेको छु भनेर माफी माग्नुको सट्टा उन्मुक्तिको कुरा गरेकाले ओली सुध्रन छाँटकाँट नदेखिएको बताएका छन् । 

“म त ओली सुध्रिन्छन् होला भनेको थिएँ । त्यही भएर म केही नबोलेर हिँडिरहेको थिएँ । हिजो चम्पादेवीमा त्यसै गरे । ख्याल गरेर बोलिरहेँ । साथीहरुले पनि त्यही सुझाएका थिए । भक्तपुरमा पनि त्यही गरेँ । बाँदर जुलुस ननिकाल्नू भनेँ । तर उल्टो भयो,” नेपालले भने ।

उनले देउवालाई विश्वासको मत दिने आफू पक्षका २२ संसद्लाई धन्यवाद समेत दिएका छन् ।