चालु आर्थिक वर्षको पहिलो चार महिनामा बैंक तथा वित्तीय संस्थाहरू (बीएफआई) को खुद नाफा १४.७१ प्रतिशतले घटेको छ । नेपाल राष्ट्र बैंक (एनआरबी) को तथ्याङ्कअनुसार वाणिज्य बैंक, विकास बैंक र वित्त कम्पनी गरी तीनवटै वर्गका बीएफआईले साउनदेखि कात्तिक मध्यसम्म कुल २१ अर्ब ३१ करोड रुपैयाँ खुद नाफा आर्जन गरेका छन् ।
अघिल्लो वर्षको सोही अवधिमा (लघुवित्त बाहेक) बीएफआईको खुद नाफा २४ अर्ब ९९ करोड रुपैयाँ रहेको थियो । बैंकर्सहरूका अनुसार अर्थतन्त्रको मन्दी, बैंकिङ कारोबारमा आएको सुस्तता, जेन–जी आन्दोलन र त्यससँग जोडिएका घटनाक्रमका कारण बैंकहरूको आम्दानी प्रभावित भएको हो ।
साथै, कर्जा ब्याजदरमा तीव्र गिरावट आउँदा ब्याज आम्दानी घट्नु पनि नाफा घट्नुको प्रमुख कारण बनेको छ । समिक्षा अवधिमा २० वटा वाणिज्य बैंकको मात्र खुद नाफा १३.११ प्रतिशतले घट्दै १९ अर्ब ३७ करोड रुपैयाँमा सीमित भएको छ ।
अघिल्लो वर्ष सोही अवधिमा वाणिज्य बैंकहरूले २२ अर्ब २९ करोड रुपैयाँ नाफा कमाएका थिए । एनआरबीका अनुसार आधारदर घटेसँगै बैंकहरूले लिने प्रिमियम दर पनि उल्लेख्य रूपमा घटाएका छन् । पहिले अधिकतम ५ प्रतिशतसम्म रहेको प्रिमियम दर हाल औसतमा करिब १.५ प्रतिशतमा झरेको छ ।
यद्यपि, चार वटा वाणिज्य बैंकको नाफा भने बढेको देखिएको छ। राष्ट्रिय वाणिज्य बैंकको नाफा १०५.२३ प्रतिशतले वृद्धि भएको छ । यस्तै, सानिमा बैंक, ग्लोबल आइएमई बैंक र एभरेष्ट बैंकको नाफा क्रमशः १९.६५ प्रतिशत, १८.९१ प्रतिशत र ०.२७ प्रतिशतले बढेको छ ।
नाफाको परिमाणका आधारमा ग्लोबल आइएमई बैंक २ अर्ब ५१ करोड रुपैयाँसहित अग्रस्थानमा रहँदा नबिल बैंकले २ अर्ब ४६ करोड रुपैयाँ नाफा कमाएको छ । बाँकी १६ वटा वाणिज्य बैंकको नाफा ०.७५ प्रतिशतदेखि १३२.९० प्रतिशतसम्मले घटेको छ ।
प्रतिक्रिया