ओली–प्रचण्डबीच महत्त्वपूर्ण समझदारी, संवैधानिक परिषद्सम्बन्धी अध्यादेश पनि फिर्ता हुने

नेपाल कम्युनिस्ट पार्टी (नेकपा) भित्र चर्किएको विवाद केही मत्थर भएको छ । बुधबार प्रधानमन्त्री तथा पार्टी अध्यक्ष केपी शर्मा ओली र कार्यकारी अध्यक्ष प्रचण्डबीच पार्टी विवाद हल गर्नका लागि महत्त्वपूर्ण समझदारी भएको नेकपाका एक स्थायी समिति सदस्यले बताए । 

यस्तै ओलीले मंगलबार ल्याएको संवैधानिक परिषद्सम्बन्धी अध्यादेश पनि फिर्ता हुने भएको छ भने संसदको अधिवेशन बोलाउन प्रचण्ड–माधव नेपाल समूहले गलाएको हस्ताक्षर अभियान पनि स्थगन गर्ने सहमति बनेको छ । सोही समझदारी पछि नेताहरु भदौ २६ को सहमति नजिक पुगेको नेकपाका नेताहरुले प्रतिक्रिया दिएका छन् । 

भदौ २६ को स्थायी समितिले सरकार  र पार्टी सञ्चालन दुई अध्यक्षको सल्लाहका आधारमा हुने तथा महत्वपूर्ण संवैधानिक तथा राजनीतिक नियुक्ति पनि सहमतिको आधारमा गर्ने निर्णय गरेको थियो । ओली सरकारका काममा केन्द्रीत हुने र प्रचण्ड पार्टीको काममा केन्द्रीत हुने निर्णय भएपनि ओलीले एकपछि अर्को गरी पार्टीको निर्णय उलंघन गर्दै अघि बढेपछि विवाद बढ्दै गएको थियो ।