कित्ता क्लियर गर्ने गजुरेलको तयारी : गुटबन्दी गर्दिनँ, प्रचण्डलाई ओलीसँग मिल्न दवाब दिन्छु

तत्काली नेकपा (माओवादी केन्द्र) का कोषाध्यक्ष तथा नेपाल कम्युनिष्ट पार्टी (नेकपा) का स्थायी समिति सदस्य हरिबोल गजुरेलले आफ्नो कित्ता क्लियर गर्ने तयारी गरेका छन् । नेकपाको फूटपछि मन्त्री पदको लागी बालुवाटार गए भन्ने आरोप लागेपछि त्यसको बचाउमा पत्रकारहरुसँग कुराकानी गर्दै उनले यस्तो संकेत गरेका हुन् । 

आज काठमाडौंको नयाँ बानेस्वरमा पत्रकारहरुसँग कुरा गर्दै गजुरेलले आफूले गुटबन्दी नगर्ने बताए । उनले विगतमा आफूले पार्टी एकताको लागि भूमिका खेल्दा अनावश्यक आरोप लगाइएको पनि गुनासो गरे । 

बिगतको आफ्नो भूमिका स्मरण गर्दै गजुरेलले आफूले ठूलो जोखिम मोलेर पार्टी एकता जोगाउँन लागि परे पनि सफल हुन नसकेकोमा दुख लागेको बताए । “ठूलो जोखिम लिएर एकताको पक्षमा लागेको थिएँ । तर सफल हुन सकिएनु, फेरि पनि पार्टी एकतामै जोड दिन्छु पार्टी एकता भएन भने त्यसले अहिलेसम्मका उपलब्धि गुम्छ । हामीले पार्टीलाई एक राख्न सकेनौं । देश विदेश तथा नेताहरू कै कारणले पनि यो अवस्था आइपुग्यो ।” गजुरेलले बताए ।

उनले आफू ओली समूहतिर कहिल्यै नगएको पनि दावी गरे । “म कतै गएको पनि छैन आएको पनि छैन । हिजो जहाँ थिए त्यहीँ छु । समान दुरीमा बसेर मैले एकता जोगाउन लागेँ । दुबै अध्यक्षको आलोचना र कमिकमजोरीलाई मैले केलाउने काम गरेको हुँ । अस्ति प्रचण्डले फोन गरेर भन्नुभयो मैले तपाईँलाई त्यति कै आशंका गरेको रहेछु । मैले एक अर्को अध्यक्षलाई भेट्दा मैले प्रष्ट रूपमा सबैलाई उनीहरुको कमजोरीका बारेमा भनेको थिएँ । म अब पनि गुटबन्दी त गर्दिनँ । अब म एकपटक प्रचण्डससँग गम्भीर रूपमा कुराकानी गर्ने तयारीमा छु । आज भेट्न जाँदै पनि छु । उहाँसँग आज गम्भीर रुपमा मैले कुरो गर्दैछु । म एक पटक पार्टी एकतालाई नै केन्द्रमा राखेर प्रचण्डसँग कुरा राख्छु, सकेसम्म फेरि एक पटक मिल्न र कम्युनिष्ट एकता जोगाउँन दवाब दिन्छु” । गजुरेलको भनाई रहेको थियो ।

गजुरेलले प्रचण्डले आफूलाई सभामुखका लागि अफर गरेको स्मरण गर्दै तर आफूलाई कुनै पद नचाहिएको बताए । तर पार्टी एकतालाई जोड दिँदै पहल गर्दा आफूमाथि बालुवाटारमा मन्त्री खान गएको आरोप लगाइएको भन्दै असन्तुष्टि पोखे ।