पार्टी अध्यक्षबाट राजीनामा दिने ओली तयार, माधव नेपाललाई पहिलो बरियता प्राप्त अध्यक्ष बन्न प्रस्ताव

प्रधानमन्त्री केपी शर्मा ओली चौतर्फी संकटमा परेसँगै पार्टीको अध्यक्ष पदबाट राजिनामा दिन समेत तयार भएका छन् । पार्टीभित्र र बाहिरबाट घेराबन्दीमा परेको निष्कर्ष निकाल्दै यसलाई तोड्न अन्तिम अस्त्र मानिएको ‘एक व्यक्ति एक पद’लाई स्वीकार गर्दै राजीनामा दिन तयार भएका छन् ।

प्रधानमन्त्री ओलीले वरिष्ठ नेता माधवकुमार नेपाललाई पहिलो बरियताको अध्यक्ष बन्न समेत आफ्ना निकटस्थ मार्फत प्रस्ताव पठाएका छन् । तर, ओलीको प्रस्ताव वरिष्ठ नेता नेपालले स्वीकार गर्छन् वा गर्दैनन् त्यो भने अहिलेसम्म प्रष्ट हुन सकेको छैन् ।

अर्कोतिर पार्टीका कार्यकारी अध्यक्ष पुष्पकमल दाहाल प्रचण्डले भने वरिष्ठ नेता नेपाललाई प्रधानमन्त्री बन्न प्रस्ताव गरेको खुमलटार निकट स्रोतले दाबी गरेको छ । तैपनि प्रधानमन्त्री ओली भने वरिष्ठ नेता नेपाललाई मनाएर मिलेनियम च्यालेन्ज कर्पोरेशन (एमसीसी) पास गराउने रणनीतिमा छन् ।

ओलीलाई प्रधानमन्त्री पदबाट हटाउन प्रचण्ड सहित वरिष्ठ नेता नेपाल, झलनाथ खनाल र प्रवक्ता नारायणकाजी श्रेष्ठ सहमत भएका छन् । गृहमन्त्री पदबाट हटाइन लागेका रामबहादुर थापा बादल पनि यो समूहमा सामेल भएको तथा उपाध्यक्ष वामदेव गौतमले समेत यो समूहलाई साथ दिने बचन दिएको स्रोतले जनाएको छ । यो सँगै ओलीको सत्ता संकट गहिरिएको छ ।

यदि वरिष्ठ नेता नेपाल अध्यक्ष बन्न सहमत नभए प्रधानमन्त्री ओलीले कठोर कदम चाल्ने संकेत निकटस्थहरूसँग गरेका छन् । त्यो कठोर कदम संसद विघटनसम्म हुनसक्ने आकलन गरिएको छ ।

मंगलबार प्रधानमन्त्री निवास बालुवाटारमा भएको प्रधानमन्त्री ओली र कार्यकारी अध्यक्ष प्रचण्डबिचको भेटघाटमा कार्यकारी अध्यक्ष प्रचण्डले उपाध्यक्ष वामदेव गौतम र महासचिव विष्णु पौडेलकै सामुन्ने राजिनामा मागेका थिए भने प्रधानमन्त्री ओलीले उपाध्यक्ष गौतम सहितका नेताहरूलाई सरकारमा सामेल गराउने योजना सुनाएका थिए ।

मंगलबारको बालुवाटारको भेटघाट पछि दुबैपक्ष आ-आफ्नो रणनीति तय गर्न आन्तरिक गृहकार्यमा लागेको छ । भने पार्टीको स्थायी कमिटीको बैठक केही बेरमै सुरु हुनु अगाडि दुबै पक्ष आफ्नो पक्षमा समीकरण बदल्न कसरत गरिरहेको बताइएको छ ।