सत्तारूढ नेकपा भित्रको मोर्चाबन्दीका कारण संकटमा परेका प्रधानमन्त्री केपी शर्मा ओली प्रधानमन्त्री पदबाट राजिनामा दिन तयार भएका छन् ।
बालुवाटार निकट उच्च राजनैतिक स्रोतका अनुसार पार्टी अध्यक्ष तथा प्रधानमन्त्री ओलीले प्रचण्ड – नेपाल समूहलाई एक प्रस्ताव पठाउँदै संसदीय दलका उपनेता सुवासचन्द्र नेम्वाङलाई प्रधानमन्त्री बनाउन प्रचण्ड – नेपाल समूह तयार भए आफूले प्रधानमन्त्री पदबाट राजीनामा दिन तयार रहेको सन्देश आफूनिकट नेतामार्फत पठाएको जानकारी दिएको छ ।
यो सँगै नेकपा विवाद नयाँ मोडमा प्रवेश गरेको छ । ललितपुरको झम्सिखेलस्थित अगेनो रेस्टुरेन्टमा बुधबार साँझ बसेको ओली इतर समूहको गोप्य बैठकले ओलीले अध्यक्ष र प्रधानमन्त्री दुबै पद छाड्न नमाने जबर्जस्ती हटाउने आन्तरिक तयारी थालेपछि प्रधानमन्त्री ओलीले यस्तो प्रस्ताव पठाएका हुन् ।
उक्त प्रस्ताव अनुसार पार्टी अध्यक्ष पदमा ओली कायम रहने कार्यकारी अध्यक्ष पुष्पकमल दाहाल प्रचण्ड, वरिष्ठ नेताद्वय माधवकुमार नेपाल र झलनाथ खनाललाई सल्लाहकार बनाउने ओलीको प्रस्ताव छ । ओलीको यो प्रस्तावलाई प्रचण्ड – नेपाल समूहले के जवाफ दियो भन्ने सार्वजनिक भैसकेको छैन् ।
बिहीबार बिहान ११ बस्ने स्थायी कमिटी बैठकमै प्रधानमन्त्री ओलीको तर्फबाट यो प्रस्ताव औपचारिक रूपमा नै स्थायी कमिटीको बैठकमा पेश हुने सम्भावना रहेको ओली निकट एक स्थायी समिति सदस्यले जानकारी दिए ।
प्रतिक्रिया