Logo

समाचार

सुहानालाई जन्मदिनमा आयो विवाह प्रस्ताव



मुम्बई । बलिउडका ‘किङ खान’ अर्थात् शाहरुख खानकी छोरी सुहाना खान प्रायः चर्चाको विषय बन्छिन् । सुहानाले हालसम्म बलिउडमा पाइला चालेकी छैनन् । तर उनको लोकप्रियता कुनै स्टारको भन्दा कम छैन ।

सुहानाले हालैमात्र आफ्नो २१ औं जन्मदिन मनाइन् । रोचक कुरा के छ भने उनको जन्मदिनमा उनलाई विवाहको प्रस्ताव पनि आएको छ ।

दैनिक जागरणका अनुसार सुहानाको जन्मदिनमा उनकी आमा गौरीले ट्वीटरमा एक पोस्ट शेयर गरेकी थिइन् । जसमा उनले सुहानाको तस्वीरसँगै जन्मदिनको शुभकामना दिएकी थिइन् । गौरीले तस्वीरसँगै ‘ह्याप्पी बर्थडे, तिमी निकै राम्री छौं आज, भोलि र जहिल्यै’ लेखेकी थिइन् ।

गौरीको यो पोस्टमा कैयौंले प्रतिक्रिया दिँदै सुहानालाई शुभकामना दिएका थिए । त्यही भीडमा एक प्रयोगकर्ताले प्रतिक्रिया दिँदै सुहानासँग आफूले विवाह गर्न चाहेको उल्लेख गरेका थिए ।

‘गौरी मेम मेरो विवाह सुहानासँग गराइदिनुहोला । मेरो मासिक तलब एकलाख बढी छ’, ती प्रयोगकर्ताले लेखेका छन् ।

ती व्यक्तिको यो प्रतिक्रिया सामाजिक सञ्जालमा भाइरल भएको छ । कैयौंले यो प्रतिक्रियामा अर्को प्रतिक्रिया दिँदै ‘तस्वीरमा सुहानाले बोकेको ब्यागको मूल्य नै तीन लाख रुपैंयाँ हो’ भनी लेखेका छन् ।

सुहाना खान । तस्वीर : डीएनए इण्डिया

प्रकाशित मिति : १२ जेष्ठ २०७८, बुधबार  २ : ५५ बजे