अमेरिकी राष्ट्रपति डोनल्ड ट्रम्पले गाजाको “युद्ध समाप्त भएको” बताएका छन्। गाजाका बन्धक रिहाइका निम्ति इजरेल प्रस्थान गर्नुअघि उनले यस्तो बताएका हुन्।
सङ्घर्षविराम सम्झौताअनुरूप हमासले सबै इजरेली बन्धकहरू सुम्पिँदै छ। उक्त प्यालेस्टिनी समूहसँग ४८ बन्धकहरू फिर्ता गर्न स्थानीय समयअनुसार सोमवार दिउसो १२:०० बजेसम्मको समय छ। ती ४८ मध्ये २० जना जीवितै रहेको ठानिएको छ।
बदलामा इजरेलले २५० जना प्यालेस्टिनी बन्दीहरू र हिरासतमा लिइएका १,७०० भन्दा धेरैलाई रिहा गर्ने बताइएको छ। इजरेल प्रस्थान गर्ने क्रममा ट्रम्पले “युद्ध सकिएको” र “सङ्घर्षविरामको स्थिति कायम रहने” बताए।
“म युद्धहरू समाधान गर्नमा र शान्ति स्थापना गर्नमा राम्रो छु,” उनले थपे। इजरेलमा ट्रम्पले प्रधानमन्त्री बेन्जमिन नेतन्याहूलाई भेट्ने र इजरेली संसद्लाई सम्बोधन गर्ने ठानिएको छ।
उनले नेतन्याहूसँग आफ्नो “निकै राम्रो” सम्बन्ध भएको बताए। नेतन्याहूलाई “युद्धकालीन राष्ट्रपति”को संज्ञा दिँदै ट्रम्पले भने, “उनले निकै राम्रो काम गरे।
उनीसँग मेरो केही मतभेद पनि रह्यो तर त्यो चाँडै सुल्झियो।” इजरेलबाट उनी इजिप्ट प्रस्थान गर्ने छन्। त्यहाँ उनले मध्यपूर्वमा शान्ति स्थापना गर्नेसम्बन्धी शिखर सम्मेलन आयोजना गर्ने छन्। उक्त सम्मेलनमा ब्रिटिश प्रधानमन्त्री किअर स्टार्मरसहितका विश्व नेताहरू सामेल हुने छन्।
तेल अभिभमा ‘सुखद खबर’को प्रतीक्षा
ठूलो सङ्ख्यामा इजरेलीहरू तेल अभिभको ‘होस्टेजेज स्वायर’मा जम्मा भएका विवरणहरू आएका छन्। त्यहाँ जडान गरिएका ठूल्ठूला ‘स्क्रिन’हरूमा बन्धक रिहाइका दृश्यहरू प्रत्यक्ष प्रसारण गरिने बताइएको छ।
बन्धक तथा बेपत्ताका परिवारसम्बन्धी ‘फोरम’ले केही बेरअघि सामाजिक सञ्जाल ‘एक्स’मा एउटा तस्बिर पोस्ट गरेको छ जसमा बन्धक रिहाइको प्रतीक्षामा रहेका सयौँलाई देख्न सकिन्छ। “उक्त स्थल बन्धकहरूको प्रतीक्षामा छ,” ती सामग्रीहरूमा भनिएको छ। दुई वर्षपछि ती बन्धकहरूलाई छाड्न लागिएको हो।
गाजामा तनाव
यसैबीच गाजा सिटीमा हमासका सुरक्षा बल र दुगमुश समूहबीच भीषण झडप हुँदा कम्तीमा २७ जना मारिएका विवरणहरू आएका छन्। यसलाई उक्त क्षेत्रमा इजरेली कारबाही समाप्त भएपछिको सबैभन्दा हिंस्रक आन्तरिक टकरावमध्येको ठानिएको छ।
स्थानीय स्रोतहरूका अनुसार दुगमुशतर्फका १९ र हमासतर्फका ८ जना मारिएका हुन्। इजरेली फौजले हालसालै खालि गरेको गाजाका क्षेत्रहरू हमासले आफ्नो सुरक्षा बलका सदस्यहरूलाई परिचालन गरेको थियो।
गाजा सिटीको सब्रा क्षेत्रमा शक्तिशाली दुगमुश समूहका बन्दुकधारीले हमासको विशेष फौजका दुई जनालाई गोली हानेर मारिदिएपछि तनाव बढेको विवरणहरू आएका छन्। बीबीसी नेपालीबाट ।
प्रतिक्रिया