काठमाडौँ । फागुन २१ गते हुने प्रतिनिधि सभा सदस्य निर्वाचनका लागि उम्मेदवारहरूको उमेर समूह निकै विविधतापूर्ण र रोचक देखिएको छ।
निर्वाचन आयोगले सार्वजनिक गरेको मनोनित उम्मेदवारहरूको विवरण अनुसार यस पटक चुनावी मैदानमा २५ वर्षका तन्नेरीदेखि ८८ वर्षका वृद्धसम्मले आफ्नो भाग्य परीक्षा गर्दैछन्।
यस निर्वाचनमा सबैभन्दा ज्येष्ठ उम्मेदवारको रूपमा सर्लाही क्षेत्र नं. २ बाट नेपाल कम्युनिष्ट पार्टीका ८८ वर्षीय महेन्द्र राय यादव चुनावी मैदानमा छन्।
उनीसँगै काठमाडौं क्षेत्र नं. ४ बाट ८७ वर्षीय मदन देव आचार्य र झापा क्षेत्र नं. १ बाट ८३ वर्षीय हिरण्य प्रसाद भट्टराईले पनि उम्मेदवारी दिएका छन्। पाको उमेरका यी उम्मेदवारहरूको उपस्थिति उमेरले राजनीतिमा बाधा पुर्याउँदैन भन्ने उदाहरण बनेको छ।
अर्कोतर्फ, युवा जोशका साथ उमेरको न्यूनतम मापदण्ड २५ वर्ष पुरा गरेका उम्मेदवारहरूको संख्या पनि उल्लेख्य छ। धनकुटाका शालिक राम राई, मोरङकी गंगा कुमारी राजवंशी,
धनुषाका आनन्द दास तत्मा र रौतहटका पिन्टु दास तत्मा जस्ता युवाहरू २५ वर्षकै उमेरमा देशको नीति निर्माण तहमा पुग्ने लक्ष्यका साथ प्रतिस्पर्धामा होमिएका छन्। युवा उम्मेदवारहरूमा स्वतन्त्र र विभिन्न राजनीतिक दलका उम्मेदवारहरूको उत्साहजनक सहभागिता रहेको छ।




















प्रतिक्रिया