इंग्लिस क्लब म्यानचेस्टर युनाइटेड युइएफए च्याम्पियन्स लिगको समूह चरणबाटै बाहिरिएको छ ।
गएराती भएको समूह चरणको अन्तिम खेलमा जर्मन क्लब आरबी लाइप्जिगसँग ३–२ ले पराजित भएसँगै युनाइटेड समूह चरणबाटै बाहिरिएको छ ।
घरेलु मैदानमा मंगलबार राति भएको खेलमा लाइप्जिगको जितमा एन्जेलिनो, एमाडोउ हैडारा र जस्टिन क्लुभर्टले समान एक एक गोल गरे ।
खेलको दोस्रो मिनेटमा नै एन्जेलिनोले गोल गर्दै घरेलु टोलीलाई १–० को अग्रता दिलाएका लिए । उनले मार्सेल सबित्जरको पासमा गोल गरेका थिए । १३औं मिनेटमा एमाडोउ हैडाराले एन्जेलिनोको पासमा गोल गर्दै लाइप्जिगको अग्रता दोब्बर पारे ।त्यस्तै ६९औं मिनेटमा जस्टिन क्लुभर्टले एमाडोउ हैडाराको पासमा गोल गरेपछि लाइप्जिग सहज जिततर्फ अग्रसर बनेको थियो ।
खेलमा ३–० ले पछि परेको युनाइटेडले त्यसपछि लगातार दुई गोल गर्दै खेलमा फर्कने संकेत दिएपनि त्यो जितको लागि पर्याप्त भएन । ८०औं मिनेटमा ब्रुनो फर्नान्डेसले पेनाल्टीमा गोल गर्दै खेललाई ३–१ को अवस्थामा ल्याए । मासन ग्रीनवुडलाई पेनाल्टी बक्समा कोनाटले लडाएपछि प्राप्त पेनाल्टी गोलमा परिणत भएको थियो, लगत्तै ८२औं मिनेटमा पल पोग्वाले गोल गर्दै खेललाई ३–२ को अवस्थामा ल्याएपनि त्यसपछि गोल निस्कन नसक्दा युनाइटेड पराजित हुन बाध्य बन्यो ।
प्रतिक्रिया