Logo

प्रमुख समाचार

सरकार र सत्ता गठबन्धनले सार्वभौम संसद्लाई नै बिचौलियाको खेल मैदानः प्रचण्ड



 

काठमाडौँ । प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले सरकार र सत्ता गठबन्धनले सार्वभौम संसद्लाई नै बिचौलियाको खेल मैदान बनाएको गम्भीर आरोप लगाएका छन् ।

सोमबार प्रतिनिधिसभा बैठकलाई विशेष सम्बोधन गर्दै पूर्वप्रधानमन्त्री समेत रहेका प्रचण्डले आफू नेतृत्वको सरकारलाई हटाएर दुई ठुला दल मिलेर बनेको सरकारले एक वर्षको अवधिमा जनताको पक्षमा कुनै काम गर्न नसकेको बरु सरकार र संसद् दुवै बिचौलियाको खेल मैदान बनेको आरोप लगाएका हुन् । उनले सुशासन, विकास, भ्रष्टाचार नियन्त्रण र अर्थतन्त्र सुधार तथा संविधान संशोधनमा सरकार चुकेको दाबी गरे ।

करिब १ घण्टा सम्बोधन गरेका ‘प्रचण्ड’ ले सुरुमै देश बहुआयामिक सङ्कटको जोखिममा रहेको भन्दै गम्भीर चिन्तासहित आफ्नो मन्तव्य सुरु गरेका थिए । विस्तृत शान्ति सम्झौता र संविधान निर्माणका बेला जनतासँग गरिएको सपना र प्रतिबद्धता आजको अवस्थासँग मेल नखाने बताउँदै वर्तमान सत्ताको कार्यशैलीले ती सबै सपना र प्रतिबद्धतालाई अपमानित बनाएको प्रचण्डको टिप्पणी छ ।

‘के हामी शान्ति सम्झौताका बेला देखिएको सपना अनुसार अघि बढिरहेका छौँ ?’ भन्ने प्रश्न गर्दै प्रचण्डले भ्रष्टाचार, अराजकता र बेथिति मौलाएको, सार्वजनिक सेवामा पहुँच कठिन भएको र पछाडि पारिएका समुदायलाई राज्यले आवश्यक संरक्षण दिन नसकेको बताए ।

संसद् र संसदीय समितिमा भइरहेका गतिविधि र भूमिकाप्रति समेत असन्तुष्टि जनाउँदै प्रचण्डले विधेयकहरू सर्वसम्मत पारित भए पनि प्रतिनिधिसभामा पुग्दा भएका चलखेल र हस्तक्षेपले अगाडि बढ्न नसकेकोमा सरकारको आलोचना गरे ।

अध्यक्ष प्रचण्डले दुई ठुला दलहरूको मिलेमतोले संसद्लाई ‘बिचौलियाको खेलमैदान’ बनाइएको आरोप लगाउँदै यस्तो प्रवृत्ति देश र जनताका लागि लज्जास्पद र खेदजनक भएको टिप्पणी गरे ।

लोकतन्त्र सुदृढ गर्न सुशासन, सामाजिक न्याय र आर्थिक समृद्धिको मार्गमा सरकार गम्भीर रूपमा लाग्नुपर्नेमा जोड दिँदै, यदि गम्भीर समीक्षा र कठोर निर्णयहरू गरिएनन् भने परिस्थिति विस्फोटक बन्न सक्ने प्रचण्डको चेतावनी छ ।

प्रकाशित मिति : ३० असार २०८२, सोमबार २१:०३   :  बजे

21
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।