काठमाडौं। नेपाल आयल निगमले पेट्रोलियम पदार्थको खुद्रा बिक्री मूल्य यथावत् राख्ने निर्णय गरेको छ।
अन्तर्राष्ट्रिय बजारमा पेट्रोलियम पदार्थको मूल्य बढे पनि उपभोक्तालाई राहत दिने उद्देश्यले निगमले पेट्रोल, डिजेल, मट्टितेल, हवाई इन्धन र एलपी ग्यासको मूल्य नबढाउने भएको हो।
निगमको निर्णयअनुसार पहिलो वर्गअन्तर्गतका क्षेत्रमा पेट्रोलको मूल्य प्रतिलिटर १९७ रुपैयाँ ५० पैसा कायम गरिएको छ। सोही क्षेत्रमा डिजेल र मट्टितेलको मूल्य पनि प्रतिलिटर १९७ रुपैयाँ ५० पैसा नै रहनेछ।
त्यस्तै, दोस्रो वर्गका क्षेत्रमा पेट्रोल, डिजेल र मट्टितेलको मूल्य प्रतिलिटर १९९ रुपैयाँ कायम गरिएको छ भने तेस्रो वर्गका क्षेत्रमा प्रतिलिटर २०० रुपैयाँ कायम गरिएको छ।
निगमले आन्तरिक हवाई इन्धनको मूल्य प्रतिलिटर २४९ रुपैयाँ र एलपी ग्यासको मूल्य प्रतिसिलिन्डर २ हजार ६० रुपैयाँ यथावत् राखेको छ।
अन्तर्राष्ट्रिय बजारमा पेट्रोलियम पदार्थको मूल्य वृद्धि भए पनि भारतीय आयल कर्पोरेसन आईओसी बाट प्राप्त नयाँ खरिद मूल्यअनुसार बिक्री मूल्य समायोजन नगर्दा निगमलाई पाक्षिक रूपमा ३ अर्ब ४५ करोड ६१ लाख रुपैयाँ घाटा हुने देखिएको छ।
उपभोक्तालाई मूल्यवृद्धिको भारबाट जोगाउन निगमले तत्काल मूल्य समायोजन नगरेको हो।
प्रतिक्रिया