Logo

समाचार

मनकामना केबलकारको २८ वर्ष पूरा, दुई करोड १२ लाख यात्रुले लिए सेवा



काठमाडौं। नेपालको पहिलो केबलकारका रूपमा परिचित मनकामना केबलकारले सञ्चालनको २८ वर्ष पूरा गरेको छ। मनकामना दर्शन प्रालिद्वारा सञ्चालित केबलकार २९औँ वर्षमा प्रवेश गरेको हो।

चितवन को- ई समूहअन्तर्गत सञ्चालित मनकामना केबलकार सन् १९९८ मा स्थापना भएको थियो। सञ्चालनमा आएदेखि हालसम्म केबलकारले २ करोड १२ लाखभन्दा बढी यात्रुलाई सेवा प्रदान गरिसकेको कम्पनीले जनाएको छ।

कम्पनीले ७ मंसिर २०८३ मा जारी गरेको प्रेस विज्ञप्तिअनुसार स्वर्गीय लक्ष्मणबाबु श्रेष्ठको परिकल्पना तथा नेतृत्वमा स्थापना भएको मनकामना केबलकारले नेपालको पर्यटन र पूर्वाधार विकासमा महत्वपूर्ण योगदान पुर्‍याउँदै आएको छ।

२८ वर्षको यात्रा पूरा गरेको अवसरमा कम्पनीले संस्थापक श्रेष्ठप्रति श्रद्धाञ्जली व्यक्त गर्दै उहाँको दूरदृष्टि र मार्गनिर्देशनलाई आत्मसात् गर्दै अघि बढ्ने प्रतिबद्धता जनाएको छ।

कम्पनीले यात्रुहरूको निरन्तर विश्वास र सहयोग, कर्मचारीहरूको मेहनत तथा समर्पण र पर्यटन एवं आतिथ्य क्षेत्रका साझेदारहरूको सहकार्यलाई आफ्नो सफलताको प्रमुख आधारका रूपमा लिएको छ।

यसैगरी, सहिद लखन गाउँपालिका, इच्छाकामना गाउँपालिका, स्थानीय समुदाय, चितवन तथा गोरखा जिल्ला प्रशासन कार्यालय र सम्पूर्ण शुभेच्छुकप्रति कम्पनीले आभार व्यक्त गरेको छ।

कम्पनीले आगामी दिनमा पनि यात्रुलाई सुरक्षित, सहज र गुणस्तरीय सेवा प्रदान गर्दै मनकामना दर्शनको अनुभवलाई थप उत्कृष्ट बनाउने प्रतिबद्धता व्यक्त गरेको छ।

प्रकाशित मिति : ६ मंसिर २०८३, आईतवार १९:१८   :  बजे

0
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।