सीआईबीको भन्याे– ‘सुन तस्करी प्रकरणबारे कुनै सूचना र प्रमाण भए उपलब्ध गराउनू’

कामठाडौं । नेपाल प्रहरीको केन्द्रीय अनुसन्धान ब्यूरो (सीआईबी)ले सुन तस्करी प्रकरणबारे कुनै तथ्य प्रमाण, सूचना भए पठाएर सहयोग गर्न अनुरोध गरेको छ। सीआईबीका सूचना अधिकारी, प्रहरी उपरीक्षक नवराज अधिकारीले त्यस्ता सूचना, तथ्य वा प्रमाण यस कार्यालयमा प्रत्यक्षरुपमा आई उपलब्ध गराउन वा इमेलमार्फत पनि पठाउन सकिने बताए।

सूचनाले अपराध अनुसन्धानमा सहयोग गर्ने भन्दै सीआईबीले यस्ता आग्रह गरेको हो । यसरी प्राप्त भएको जानकारी वा सूचनाको श्रोत गोप्य रहने पनि प्रहरी उपरीक्षक अधिकारीको भनाइ छ। उनका अनुसार सुनका विषयमा कसैसँग केही सूचना, तथ्य वा प्रमाण भएमा यस ब्यूरोको इमेल ठेगाना वा ९८५१२९१३११ मा पठाउन वा सूचना अधिकारीको सम्पर्क नम्बर ९८५१२९१३११ मा जानकारी दिन सकिने उल्लेख गरिएको छ।

विभिन्न गिरोहले अवैधरुपमा भन्सार छली ल्याएको सुन प्रकरणका सम्बन्धमा केही दिन यता विभिन्न सञ्चारमाध्यममा प्रकाशित तथा प्रसारित भएका समाचारका सम्बन्धमा आफ्नो ध्यानाकर्षण भएको पनि सीआईबीले जनाएको छ।

एक महिना अघि भन्सार छली ल्याइएको सुनको सुक्ष्मरुपमा अनुसन्धान गरिरहेको जनाइएको छ। यसभन्दा अगाडिका विभिन्न मितिमा भएका सुन तस्करी प्रकरणका सम्बन्धमा समेत यस केन्द्रीय अनुसन्धान ब्यूरोबाट सूक्ष्मरुपमा अनुसन्धान भइरहेको ब्यूरोले आज एक सूचना जारी गरी जनाएको छ।