काठमाडौं । प्रधानमन्त्री केपी शर्मा ओलीले युवाहरूलाई उद्यमशील बनाउन स्टार्टअप ऋण सहायता दिई यस वर्ष कम्तीमा ५ सय उद्यमीलाई कर्जा प्रवाह गरिने बताएका छन् ।
प्रतिनिधिसभाको आजको बैठकमा सांसदहरुका प्रश्नको जवाफ दिने क्रममा प्रधानमन्त्री ओलीले सिर्जनशीलता तथा नवप्रवर्तनलाई प्रोत्साहन गरी स्टार्टअपमा आधारित उद्यमशीलता विकासमा लगानीकर्ताहरूलाई आकर्षित गर्न सहुलियत ब्याजदरमा कर्जा प्रवाह गर्ने कार्यक्रममा इच्छुक प्रस्तावकहरूबाट छनोट प्रक्रिया अन्तिम चरणमा पुगेको जानकारी दिए ।
प्रधानमन्त्री ओलीले स्वदेशमै उत्पादन र उत्पादकत्व विस्तार गर्दै आन्तरिक रोजगारीको दीगो आधार तयार गर्ने उद्देश्यले सरकारले हालै सम्पन्न राष्ट्रिय श्रम तथा रोजगार सम्मेलनको महत्त्वपूर्णता बताउँदै भने ‘संसार अब ग्लोबल भिलेज बनेको छ, जहाँ व्यवसाय, रोजगारी र अध्ययनका लागि जसैले चाहे पनि विदेश जान सक्छ।’
साथै, ओलीले युवाहरूको विदेश जानको निर्णयलाई नकारात्मक रूपमा नलिनुपर्ने बताएका छन्। उनले भने ‘देशका युवा बाहिरिए भन्ने कुरा पूरै नकारात्मक दृष्टिकोणबाट बुझ्नु हुँदैन। व्यक्तिगत रूपमा विदेश जानुलाई गौरवको विषय ठान्नु र सामाजिक रूपमा नकारात्मक भाष्य बनाउनु भनेको गलत सन्देश फैलाउनु हो।’
मुलुकमा औद्योगिक लगानीको वातावरण सुधार गरी लगानीमैत्री बनाउन, स्वदेशी लगानीलाई प्रोत्साहन गर्दै विदेशी लगानी आकर्षित गर्न, उत्पादन र उत्पादकत्व बढाउँदै रोजगारी सिर्जना गर्न तथा आयात व्यवस्थापन र निर्यात प्रवद्र्धनमार्फत व्यापार घाटा न्यूनीकरण गर्न विभिन्न नीतिगत एवं कानूनी सुधारका साथै व्यवसायमैत्री कानुन बनाइएको प्रधानमन्त्री ओलीको भनाइ थियो ।
प्रतिक्रिया