बारामा सामेबार साढे ४ बजेबाट अचानक आगलागी हुँदा ७ वटा फुसको घर जलेर नष्ट भएका छन् । कलैया उपमानगरपालिका- २४ बस्ने शोभालाल चौधरीको घरमा अचानक आगलागी हुँदा ७ वटा घर जलेर नष्ट भएका हुन् ।
जिल्ला प्रहरी कार्यालय बाराका प्रवक्ता प्रहरी नायब उपरीक्षक गौतम मिश्रले जानकारी दिएअनुसार आगलागीबाट ८ लाख ८५ हजार रुपैयाँ मूल्य बराबरको क्षति भएको अनुमान गरिएको छ ।
आगलागीमा परी स्थानीय शोभा लाल चौधरी, टुकल महतोको २/२ लाख, राम अवतार चौधरीको १ लाख, शिशुपाल चौधरी, राम किशोर चौधरी र करी खाँ थारुको ५०/५० हजार तथा राम लाल चौधरीको १ लाख ८५ हजार मूल्य बराबरको क्षति भएको अनुमान गरिएको स्थानीय प्रहरी चौकी पचरौताले जनाएको छ ।
दमकलको मद्दतमा स्थानीय बासिन्दा र प्रहरीले सवा ७ बजे आगो नियन्त्रणमा लिएका थिए भने आगो लाग्नुको कारण खुलेको छैन ।
प्रतिक्रिया