Logo

प्रमुख समाचार

शीतल निवासमा बोलाइएको अन्तरिम सरकारसम्बन्धी वार्ता दिउँसो दुई बजेलाई सर्‍यो



काठमाडौं । राष्ट्रपति कार्यालय शीतल निवासमा आज बिहान ९ बजेका लागि तय गरिएको अन्तरिम सरकार गठनसम्बन्धी वार्ता आन्तरिक तयारीका कारण दिउँसो २ बजेसम्मका लागि सारिएको छ।

राष्ट्रपति कार्यालय स्रोतले जानकारी दिएअनुसार वार्ता सारिनुको कारण “आन्तरिक तयारी” रहेको छ।

राष्ट्रपति रामचन्द्र पौडेलले अन्तरिम सरकार गठनसम्बन्धी विषयमा संविधानविद्, कानुनविद्, राजनीतिक दलका नेता तथा जनजागरण (जेनजी) आन्दोलनका प्रतिनिधिहरूसँग बिहीबारदेखि छलफल गर्दै आएका छन्। सर्वपक्षीय छलफल बिहीबार मध्यरातबाट सुरु भई शुक्रबार बिहान ३ बजेसम्म चलेको थियो।

अन्तरिम सरकारको नेतृत्व पूर्वप्रधानन्यायाधीश सुशीला कार्कीलाई दिने विषयमा प्रारम्भिक सहमति जुटे पनि संवैधानिक प्रक्रिया अस्पष्ट रहेका कारण अन्तिम सहमतिमा पुग्न नसकेको बताइएको छ। संविधानको धारा ७६ अनुसार प्रधानमन्त्री प्रतिनिधिसभाको सदस्य हुनुपर्ने प्रावधानले प्रक्रिया जटिल बनाएको स्रोतहरूले जनाएका छन्।

यही विषयमा राष्ट्रपति पौडेलले संविधानको धारा ६१(४) अन्तर्गत रहेको ‘बाधा अड्काउ फुकाउ’ अधिकार प्रयोग गर्न सक्ने सम्भावनाबारे संविधानविद् डा. भीमार्जुन आचार्य, डा. विपिन अधिकारीलगायतसँग परामर्श गरेका थिए।

यसबीचमा संसद् विघटनको माग गर्दै उभिएको जेनजी आन्दोलनका युवाहरूले राजनीतिक संवादमा दबाब कायम गरिरहेका छन्।

प्रकाशित मिति : २७ भाद्र २०८२, शुक्रबार १०:२०   :  बजे

189
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।