डा. मनोज केसीलाई सीआईबी प्रमुखको जिम्मेवारी

नेपाल प्रहरीको केन्द्रीय अनुसन्धान ब्यूरो (सीआईबी) को प्रमुखमा डा. मनोज केसीलाई सरूवा गरेको छ।

आइतबार बसेको मन्त्रिपरिषद्को बैठकले डा. केसीलाई सीआईबी प्रमुख बनाएको हो ।

‘नेपाल प्रहरीको केन्द्रीय अनुसन्धान ब्यूरो प्रमुखमा एआईजी मनोजकुमार केसीलाई सरुवा गरिएको छ,’ गृहमन्त्री ओमप्रकाश अर्यालले आइतबारको मन्त्रिपरिषद् बैठकपछि सिंहदरबारमा भने ।

डा. केसीले नक्कली भुटानी शरणार्थी प्रकरणमा ठूला नेतालाई पनि तानेका थिए । नक्कली भुटानी शरणार्थी प्रकरणमा कांग्रेस नेतृ डा. आरजु राणसहित अनुसन्धान गर्दा उनलाई हटाइएको थियो।

अहिले फेरि केसीलाई नै सुशीला कार्की नेतृत्वको अन्तरिम सरकारले सीआईबी प्रमुख बनाएको हो । नक्कली भुटानी शरणार्थी प्रकरण खोतल्दा ट्वासीका रुपमा रहेका उनी अहिले सीआईबीको नेतृत्व गर्दै फर्किएका छन्।

केसीले नै बालुवाटारस्थित ललिता निवासको जग्गा विक्री प्रकरणमा पनि अनुसन्धान गरेका थिए । वर्तमान आईजीपी चन्द्रकुवेर खापुङ आगामी कात्तिक १७ गते अवकाशमा गएपछि खाली हुने आईजीका लागि केसी बलिया दाबेदारमध्ये एक हुन् ।