काठमाडौँ । आम जनता पार्टी (आजपा)ले काठमाडौँ उपत्यकाको १५ वटै निर्वाचन क्षेत्रको उम्मेदवार टुङ्गो लगाएको छ । काठमाडौँका १०, ललितपुरका ३ र भक्तपुरका २ गरी १५ वटै निर्वाचन क्षेत्रमा आजपाले उम्मेदवार टुङ्गो लगाएको हो ।
काठमाडौँको कोटेश्वर स्थित आजपा केन्द्रीय कार्यालयमा आज बसेको बैठकले १५ वटै निर्वाचन क्षेत्रको उम्मेदवार टुङ्गो लगाउँदै उम्मेदवारी दर्ताका लागि पार्टीबाट आधिकारिक पत्र समेत दिएको छ ।
काठमाडौँ क्षेत्र नं. १ मा कमल सुवेदी, २ मा तिलक थापामगर, ३ मा रुपसागर उपाध्याय, ४ मा कमेश सिंह, ५ मा देव थापा, ६ मा सफलता बोगटी, ७ मा प्रदीप भट्टराई,
८ मा खगेस रञ्जित, ९ मा इरज श्रेष्ठ र १० मा मीन बुढाथोकीलाई आजपाले उम्मेदवार बनाएको संगठन विभाग प्रमुख त्रिभुवन साहले जनाएका छन् । आजपाले चुनावी गठबन्धन गरेको जनादेश पार्टीबाट काठमाडौँ ४ मा सिंह र काठमाडौँ ७ मा भट्टराई उम्मेदवार हुन् ।
ललितपुरको क्षेत्र नंं. १ मा अरुण संजु, २ मा लखिन्द्र साह र ३ मा रामप्रसाद भट्टलाई आजपाले उम्मेदवार बनाएको छ । यसैगरी भक्तपुर क्षेत्र नं. २ मा देवकुमारी साह र भक्तपुर क्षेत्र नं. १ मा आजपा अध्यक्ष प्रभु साहले उम्मेदवार टुङ्गो लगाउने जिम्मेवारी पाएका छन् ।
आजपा सचिवालय सदस्य सुभाष साहका अनुसार पार्टीले सातै प्रदेशको १६५ वटै क्षेत्रमा उम्मेदवारलाई प्रतिस्पर्धामा उतार्दैछ ।
काठमाडौँ उपत्यकाको १५ सहित कोशी, मधेस, बागमती, गण्डकी, लुम्बिनी, कर्णाली, सुदूरपश्चिम प्रदेश सहित सातै वटै प्रदेशका सबै क्षेत्रमा आजपाका उम्मेदवार माघ ६ गते उम्मेदवारी दर्ता गर्ने अन्तिम तयारीमा जुटेका छन् ।
प्रतिक्रिया