विराटनगर । झापाको गौरादह नगरपालिकाका प्रमुख छत्रपति सुवेदीमाथि आफ्नै निवास गौरादह ५ मा भएको आक्रमणको घटनालाई प्रहरीले गम्भीरतापूर्वक लिँदै दोषीमाथि कडा कानुनी कारबाही अघि बढाएको छ ।
आइतबार साँझ मेयर सुवेदीको घरमै पुगेर हातपात गर्ने ३४ वर्षीय भीष्म सिटौलालाई इलाका प्रहरी कार्यालय दमकले नियन्त्रणमा लिएको छ ।
जिल्ला प्रहरी कार्यालय झापाकी प्रमुख प्रहरी उपरीक्षक बसुन्धरा खड्काले घटनाको पुष्टि गर्दै दोषीमाथि कानुनी प्रक्रिया सुरु भइसकेको जानकारी दिइन् ।
एसपी खड्काका अनुसार पक्राउ परेका सिटौलामाथि अभद्र व्यवहार अन्तर्गत निवेदन दर्ता गरी अनुसन्धान अघि बढाइएको छ ।
‘हामीलाई अभद्र व्यवहारको जाहेरी आएको छ र मान्छे हाम्रो नियन्त्रणमा छ । घटनाको सीसीटीभी फुटेज पनि प्रष्ट छ, जसमा मदिरा सेवन गरी होहल्ला गरेको र हातपात गरेको देखिएको छ । कानुनी प्रक्रिया अनुसार म्याद थप गरी अनुसन्धानलाई अगाडि बढाएका छौँ,’ उनले भनिन् ।
यस्तै, इलाका प्रहरी कार्यालय दमकका डीएसपी किशोर लम्सालका अनुसार प्रारम्भिक अनुसन्धानबाट सिटौलाले मदिरा सेवन गरी मेयरको घरमा पुगेर अभद्र व्यवहार गरेको खुलेको छ । प्रहरीले घटना लगत्तै सक्रियता देखाउँदै सिटौलालाई पक्राउ गरेको थियो ।
प्रतिक्रिया