रियाद विमानस्थलमा आक्रमण हुँदा १६ जनाको मृत्यु, तीन सय भन्दा बढी घाइते

काठमाडौं । साउदी अरबको राजधानी रियादस्थित किङ खालिद अन्तर्राष्ट्रिय विमानस्थलमा भएको क्षेप्यास्त्र आक्रमणमा १६ जनाको मृत्यु भएको छ भने ३०९ भन्दा बढी घाइते भएका छन्।

साउदी नागरिक उड्डयन अधिकारीहरूलाई उद्धृत गर्दै समाचार संस्था एसोसिएटेड प्रेस ९एपी० ले आइतबार उक्त विवरण सार्वजनिक गरेको हो।

समाचारअनुसार, विमानस्थलको आन्तरिक उडान सञ्चालन हुने टर्मिनल ३ र ४ रहेको क्षेत्रमा क्षेप्यास्त्र प्रहार भएको थियो। आक्रमणमा घाइते भएकामध्ये केहीको अवस्था गम्भीर रहेको छ। उनीहरूको विभिन्न अस्पतालमा उपचार भइरहेको छ।

मृत्यु हुनेमध्ये चार जना साउदी नागरिक र आठ जना विदेशी नागरिक रहेको विवरणमा उल्लेख छ। विदेशी मृतकमध्ये बंगलादेशका दुई जना तथा अमेरिका, इजिप्ट, जोर्डन, सिरिया, प्यालेस्टाइन र सुडानका एक–एक जना छन्।

साउदी नेतृत्वको गठबन्धनले आक्रमणका लागि छिमेकी यमनमा सक्रिय इरान समर्थित हुथी विद्रोहीलाई जिम्मेवार ठहर गरेको छ। पछिल्लो एक सातामा विमानस्थललाई लक्षित गरी भएका आक्रमणमध्ये यो सबैभन्दा घातक भएको एपीले जनाएको छ।

आक्रमणपछि अमेरिकी राष्ट्रपति डोनाल्ड ट्रम्पले हुथी विद्रोहीविरुद्ध साउदी अरबले गर्ने सम्भावित सैन्य कारबाहीमा अमेरिका सहभागी हुने वा नहुनेबारे विचार भइरहेको बताएका छन्। घटनाबारे आफूलाई जानकारी प्राप्त भएको उल्लेख गर्दै उनले आवश्यक निर्णय चाँडै लिइने बताएका थिए।

ट्रम्पले शनिबार साउदी युवराज मोहम्मद बिन सलमानसँग कुराकानी गर्ने योजना रहेको पनि बताएका थिए। उनले साउदी अरबमा भएको आक्रमण अस्वीकार्य रहेको प्रतिक्रिया दिएका छन्।

यसैबीच, अमेरिकी विदेशमन्त्री मार्को रुबियोले आक्रमणमा एक अमेरिकी नागरिकको मृत्यु भएको पुष्टि गर्दै घटनाको निन्दा गरेका छन्।

यमनमा साउदी समर्थित सरकारी सेना र हुथी विद्रोहीबीच संघर्ष जारी रहेका बेला विमानस्थलमा भएको पछिल्लो आक्रमणले क्षेत्रीय तनाव थप चर्काउने आशंका गरिएको छ। खाडी क्षेत्रमा बढ्दो द्वन्द्वसँगै साउदी अरब र उसका सहयोगी राष्ट्रहरूको सुरक्षा चुनौतीसमेत बढ्दै गएको छ।