दिल खोलेर हास्ने दिन होला कि कहिल्यै
मनले माया गास्ने दिन होला कि कहिल्यै
नेपाल र नेपालीपन खोजिरहन्छु सधै म त
आरोपहरू तास्ने दिन होला कि कहिल्यै
विश्वबन्धुत्व कुटुम्ब बनाई सारा टाढिएपछि
मिलेर सँगै बाँच्ने दिन होला कि कहिल्यै
भूमरीमा पारी देश चुस्ने काला सर्पहरू
निमोठेर मास्ने दिन होला कि कहिल्यै ?
देशमा बढेको छ अत्याचार र अराजकता
बिहानै भाले बास्ने दिन होला कि कहिल्यै ?
(लेखक : युवराज सुवेदी युबा लेखक तथा अनुसंधानकर्ता हुन्)
प्रतिक्रिया