नक्कली भ्याट बिल बनाएर राजस्व छल्ने विरुद्ध ३८ करोडको मुद्दा

राजस्व अनुसन्धान विभागले झुट्टा तथा नक्कली मूल्य अभिवृद्धि कर बिजक (भ्याट बिल) प्रयोग गरी राजस्व छली गर्ने विरुद्ध मुद्दा दायर गरेको छ । विभागले काठमाडौं महानगरपालिका १ स्थित युनिक वाइड इन्टरनेसनल प्रालि र न्यू युनिक इन्टरनेसनलका सञ्चालक भुवन पाण्डेविरुद्ध मुद्दा दायर गरेको हो । पाण्डेले ३७ करोड ८० लाख २८ हजार ७ सय रुपैयाँ बराबरको नक्कली भ्याट बिल बनाएको भन्दै विभागले सोही रकम बराबर बिगो असुल र जरिवाना समेत माग गर्दै मुद्दा दायर गरेको हो ।

विभागले सोमबार उच्च अदालत पाटनमा मुद्दा दायर गरिएको जानकारी दिएको छ । पाण्डेका यी २ कम्पनीले वस्तु तथा सेवा नै खरीद नगरी झूटा र नक्कली भ्याट बिल मात्र खरीद गरी मूल्य अभिवृद्धि कर र आयकर समेत चुहावट गरेको विभागको अनुसन्धानले देखाएको थियो ।

यी कम्पनीले मूल्य अभिवृद्धि करतर्फ १२ करोड ४२ लाख रुपैयाँ, आयकरतर्फ २२ करोड ८० लाख रुपैयाँ तथा लाभाशंतर्फ २ करोड ५७ लाख रुपैयाँ गरी कुल ३७ करोड ८० लाख रुपैयाँ राजस्व छलेको भेटिएको हो । पाण्डेविरुद्ध यही बिगो रकम कायम गरी बिगो र जरिवानासमेत असुल उपर तथा कैद सजायको माग गरिएको छ ।