राष्ट्रिय सभा उपनिर्वाचन अपडेट : मतदान अन्तिम चरणमा, आजै नतिजा

अनलाइनपाना

१७ जेष्ठ २०७८, सोमबार १३:०८

लुम्बिनी प्रदेशको रिक्त रहेको राष्ट्रिय सभा सदस्यका लागि सोमबार भइरहेको मतदान अन्तिम चरणमा पुगेको छ । एक सिटका लागि दाङको घोराहीस्थित कर्मचारी मिलन केन्द्रमा भइरहेको मतदान अन्तिम चरणमा पुगेको हो ।

सोमबार दिउँसो १ बजेसम्म स्थानीयतर्फको मतदान केन्द्रमा ८० महिला र १०८ पुरुषले मत खसालेका छन् । यस्तै प्रदेशसभा तर्फको मतदान केन्द्रमा ३० महिला र ५० पुरुषले मतदान गरेका छन्

यस्तै कोभिड तर्फको मतदान केन्द्रमा प्रदेशका ३ र स्थानीय तहतर्फका २१ जनप्रतिनिधि गरी २४ जनाले मत खसालेका छन् । यससँगै हालसम्म स्थानीय र प्रदेशतर्फ गरी २९२ जनप्रतिनिधिले मत खसालेका छन् ।

अब प्रदेशतर्फ ३ र स्थानीयतर्फ ५ जनप्रतिनिधिले मात्र मत खसाल्न बाँकी रहेको छ । जसमा नेपालगन्ज उपमहानगरपालिकाका मेयर धवल शमशेर राणाले मतदान नगर्ने यसअघि नै घोषणा गरिसकेका छन् ।

दाङको घोराहीस्थित कर्मचारी मिलन केन्द्रमा मतदान जारी मतदान दिउँसो ३ बजेसम्म रहनेछ । यस्तै मतदानलगत्तै निर्वाचनको नतिजा आज नै घोषणा गरिने प्रदेश निर्वाचन कार्यालय दाङले जनाएको छ ।
निर्वाचनमा प्रदेशसभाका ८३ सदस्य र स्थानीय तहका २१७ जनप्रतिनिधि मतदाता छन् । प्रदेशसभा सदस्यको मतभार ४८ र स्थानीय तहका जनप्रतिनिधिको मतभार १८ छ ।

एक पदका लागि नेकपा एमालेका चन्द्रबहादुर खड्का र नेपाली काँग्रेसका दृगनारायण पाण्डे चुनावी मैदानमा छन् ।