राधा र प्रकाशको प्रतिस्पर्धा

काठमाडौं । नेपाली कथानक चलचित्र ‘प्रकाश’ र ‘राधा’ आजबाट प्रदर्शनमा आएका छन् । दिनेश राउत निर्देशित ‘प्रकाश’ र सुवर्ण थापा निर्देशित ‘राधा’ एकैदिन रिलिज भएका हुन् ।

यी दुबै चलचित्र बक्सअफिसमा अपेक्षा गरिएका सिनेमा हुन् ।दुवै चलचित्रले प्रिमियर सोमा राम्रो प्रतिक्रिया पाएका छन् । ‘प्रकाश’मा मुख्य पात्र प्रदीप खड्का छन् । जो नेपाली चलचित्र उद्योगमा कमर्सियल चलचित्रमा मात्रै अभिनय गर्दै आएका कलाकार हुन् । तर, यो चलचित्रमा भने उनी चरित्र अभिनयमा होमिएका छन् ।

यता, ‘राधा’मा मुख्य पात्रमा पूर्वमिस नेपालसमेत रहेकी नायिका श्रृष्टि श्रेष्ठ छिन् । श्रृष्टिसँगै यो चलचित्रमा स्टार कलाकारको भिड छ । दयाहाङ राई, खगेन्द्र लामिछाने, निश्चल बस्नेत, सौगात मल्ल, मेनुका प्रधान, बुद्दि तामाङलगायत छन् ।

प्रकाशमा भने प्रदीपका अलावा मुख्य पात्रमा दीया मास्के र रेणु योगी छन् । रेणुका लागि ‘प्रकाश’ डेब्यु मुभी हो ।

‘प्रेम गीत’ सिरिजबाट स्टार बनेका प्रदीपको युवा पंक्तिमा लोभलाग्दो क्रेज ‘प्रकाश’का लागि मेरिट हो । ‘राधा’का लागि अहिले अभिनयका हिसावले चलेका अधिकांश कलाकार हुनु प्लस पोइन्ट छ ।