Logo

प्रमुख समाचार

कोशीमा माओवादीका आङ्बोलाई मुख्यमन्त्री बनाउने गठबन्धनको निर्णय, आजै दाबी पेस गर्ने सम्भावना



काठमाडौं। सत्तारुढ गठबन्धनले कोशी प्रदेशमा नेकपा माओवादी केन्द्रका इन्द्र आङ्बोलाई मुख्यमन्त्रीका रुपमा आघि सार्ने निर्णय गरेको छ । गठबन्धनको बिहीबार बसेको बैठकले आङ्बोलाई प्रदेशको मुख्यमन्त्रीको उम्मेदवार बनाउने निर्णय गरेको हो ।

नेपाली कांग्रेसकै प्रस्तावमा आङ्बोलाई मुख्यमन्त्रीको उम्मेदवार बनाउन लागिएको नेकपा एकीकृत समाजवादीका उपाध्यक्ष राजेन्द्र पाण्डेले जानकारी दिए । यद्यपि मुख्यमन्त्री आफूले पाउने पर्ने भन्दै कांग्रेस संस्थापन इतर पक्षका केदार कार्कीले दाबी छाडेका छैनन ।

तर सभापति शेरबहादुर देउवा माओवादीका आङ्बोलाई बनाउन सहमत भएपछि गठबन्धनले यस्तो निर्णय गरेको हो । संविधानको धारा १६८ को उपधारा ५ बमोजिमको सरकार गठन आह्वान भएयता राप्रपाले साथ नदिने भएकाले आफ्नो पार्टीको नभई माओवादीलाई नै मुख्यमन्त्री छाड्ने मनस्थितिमा थिए । सोही अनुसार आज गठबन्धनले औपचारिक निर्णय नै गरेको हो ।

उपाध्यक्ष पाण्डेका अनुसार आजै नै दाबी पेस गर्ने समेत सम्भावना छ । प्रदेश प्रमुख परशुराम खापुङले संविधानको धारा १६८ को उपधारा (५)अनुसार सरकार गठनका लागि असोज २६ गते साँझ ५ बजेसम्मको समय सीमा दिएका छन् । त्यसअघि नै दाबी पेस गर्ने तयारी गठबन्धनले गरेको हो ।

धारा १६८ को उपधारा ३ अनुसार भदौ २२ गते मुख्यमन्त्रीमा नियुक्त हिक्मत कार्कीले विश्वासको मत पाउने आधार नबनेपछि असोज २० गते पदबाट राजीनामा दिएका थिए । त्यसपछि सरकार बन्न सक्ने अन्तिम संवैधानिक विकल्प अघि सारिएको हो ।

प्रकाशित मिति : २५ आश्विन २०८०, बिहीबार १५:०१   :  बजे

114
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।