कुलमानले भने– सकेसम्म एक भएर जाने, नभए कार्यगत एकता गर्ने

काठमाडौं । उज्यालो नेपाल पार्टीका संरक्षक कुलमान घिसिङले वैकल्पिक सबै शक्तिहरु एक हुनुपर्ने बताएका छन् । सके एकता, नसके कार्यगत एकता गरेर भए पनि जानुपर्ने उनको धारणा छ ।

आज बिहान पोखरामा आयोजित कार्यकर्ता भेलालाई सम्बोधन गर्दै कुलमानले भने, ‘सही नेतृत्वहरु, वैकल्पिक शक्तिहरु सबै एक भएर जानुपर्छ । सकेसम्म एक भएर जाने, नभए कार्यगत एकता गरेर जाने अवस्थामा हामी छौं । त्यसैले सबै नयाँ र मूलधारका शक्तिहरु एक भएर जान म आह्वान गर्छु ।’

नेपाली जनताको चाहना पनि यही भएको उनले बताए । ‘आजको दिन नेपाली जनताको सबै वैकल्पिक शक्तिहरु एक होस्, अगाडि बढोस् र नयाँ नेतृत्व दिओस् भन्ने चाहना छ । यसलाई हामी सबैले बुझेर त्यसतर्फ अगाडि बढ्नुपर्छ,’ वर्तमान सरकारका मन्त्री समेत रहेका घिसिङले भने ।

एकता र सहकार्यका लागि अहिले विभिन्न तहमा संवाद भइरहेको र आगामी दिनमा यसले ठोस परिणाम दिनेमा उनले विश्वास व्यक्त गरे । आफ्नो सम्बोधनका क्रममा घिसिङले वैकल्पिक शक्तिहरूबिचको सहकार्यले मात्रै मुलुकलाई नयाँ दिशा दिन सक्ने दाबी गरे।

उनले भने, ‘आजको दिन सबैले नेपाली जनताले वैकल्पिक शक्तिहरू एक होस् अगाडि बढोस् र नयाँ नेतृत्व देओस् भन्ने चाहना छ। त्यसलाई हामी सबैले अझै बुझेर त्यसतर्फ अगाडि बढ्नु पर्नेछ। त्यस तर्फ उज्यालो नेपाल पार्टी सधैँभरि एउटा सम्मानजनक उपस्थिति, आफ्नो सम्मान र आफ्नो जुन उपस्थिति छ, आफ्नो स्वाभिमान छ त्यसलाई यथास्थितिमा राखेर त्यसलाई चाहिँ नमेटाइकन सबैसँग सहकार्य गर्न तयार छ। सहकार्य गरेरै अगाडि बढ्ने हो र यस तर्फ धेरै कुराहरू भइरहेको छ र आगामी दिनमा त्यसको रिजल्टहरू पनि धेरै आउने म चाहिँ विश्वास व्यक्त गर्न चाहन्छु।’