चारपटकको विश्व च्याम्पियन इटाली लगातार तेस्रो पटक विश्वकपमा छनोट हुन असफल

काठमाडौँ । चारपटकको विश्व च्याम्पियन इटाली लगातार तेस्रो पटक विश्वकपमा छनोट हुन असफल भएको छ ।

बोस्निया–हर्जेगोभिनासँग पेनाल्टी सुटआउटमा पराजित भएपछि इटालीको यात्रा यतिमै टुंगिएको हो । यसअघि पनि इटाली २०१८ (रुस) र २०२२ (कतार) विश्वकपमा छनोट हुन सकेको थिएन ।

खेलमा पिओ एस्पोसिटोले पेनाल्टी बाहिर प्रहार गरे भने ब्रायन क्रिस्टान्तेको प्रहार क्रसबारमा लागेर फर्कियो ।

तर पहिलो हाफको अन्त्यतिर अलेसान्द्रो बास्टोनी रातो कार्ड पाएपछि इटाली १० खेलाडीमा सीमित भयो । त्यसपछि बोस्नियाले लगातार आक्रमण गर्‍यो ।

७९औं मिनेटमा एडिन जेकोको हेडर गोलकिपर जानलुइजी डोनारुम्माले रोके पनि रिबाउन्डमा हारिस तबाकोभिचले गोल गर्दै खेल बराबरीमा ल्याए ।

पेनाल्टी सुटआउटमा बोस्नियाका सबै खेलाडी सफल भए । बेन्जामिन ताहिरोभिच, तबाकोभिच, केरिम अलाजबेगोभिच र इस्मिर बज्रक्तारेभिचले गोल गरे । इटालीका दुई प्रहार असफल भएपछि टोलि बाहिरियो ।

बोस्नियाको ऐतिहासिक सफलता
बोस्निया–हर्जेगोभिना आफ्नो इतिहासमा दोस्रो पटक मात्र विश्वकपमा छनोट भएको हो । ४० वर्षीय कप्तान एडिन जेकोको नेतृत्वमा रहेको टोलीले यसपटक समूह ‘बी’ मा क्यानडा, कतार र स्विट्जरल्यान्डसँग प्रतिस्पर्धा गर्नेछ ।

इटालीका प्रशिक्षक गट्टुसो भावुक बन्दै आफ्नो भविष्यभन्दा टोलीको असफलता ठूलो भएको बताए ।

उनले भने, ‘यो निकै पीडादायी छ। हामीलाई, सम्पूर्ण इटालीलाई यो जित आवश्यक थियो ।’

इटालियन फुटबल महासंघका प्रमुख गाब्रिएले ग्राभिनाले भने पद नछाड्ने स्पष्ट पार्दै इटालियन फुटबल गम्भीर संकटमा पुगेको स्वीकार गरे ।

इटालीका विङ्गर लियोनार्डो स्पिनाज्जोलाले भने, ‘अब इटालियन बालबालिकाले फेरि विश्वकप इटालीबिना हेर्नुपर्नेछ ।’