कपिलवस्तु ।जग्गा फुकुवा गरिदिने बहानामा सेवाग्राहीसँग गैरकानूनी रकम असुल्ने कपिलवस्तुको तौलिहवास्थित भूमिसुधार तथा मालपोत कार्यालयका एक जना कर्मचारी पक्राउ परेका छन्।
जग्गा फुकुवाको काम लिएर कार्यालय पुगेका बुद्धभूमि नगरपालिका–२, बडहराका कमलप्रसाद भट्टराईसँग २ हजार रुपैयाँ असुलेको आरोपमा मालपोतका करार कर्मचारी दुर्गादीन कुर्मी पक्राउ परेका हुन्।
सेवाग्राही भट्टराईले कर्मचारीले आफूसँग विनाकारण रकम लिएको भन्दै जिल्ला प्रशासन कार्यालय र प्रहरीमा मौखिक उजुरी दिएका थिए।
सोही उजुरीका आधारमा तत्काल एक्सनमा उत्रिएको प्रहरी टोलीले मंगलबार कुर्मीलाई पक्राउ गरेको हो। प्रहरीले सेवाग्राहीबाट लिएको उक्त २ हजार रुपैयाँसमेत कुर्मीको साथबाट बरामद गरेको छ।
जिल्ला प्रहरी कार्यालयका प्रहरी नायब उपरीक्षक (डीएसपी) रिपेन्द्रकुमार सिंहका अनुसार पक्राउ परेका कुर्मीमाथि ठगी, विश्वासघात तथा आपराधिक लाभ सम्बन्धी कसुरमा मुद्दा चलाइएको छ।
सरकारी कार्यालयहरूमा बिचौलियाको बिगबिगी र कर्मचारीबाटै हुने यस्ता अनधिकृत असुलीमाथि प्रहरीले अहिले सूक्ष्म निगरानी बढाइरहेको डीएसपी सिंहले जानकारी दिए।
सरकारी कामको सिलसिलामा कसैले अनावश्यक दुःख दिने वा रकम बार्गेनिङ गर्ने कार्य गरेमा तत्काल प्रहरीलाई खबर गर्नसमेत उनले सर्वसाधारणलाई आग्रह गरेका छन्।
प्रतिक्रिया