काठमाडौं । काठमाडौं उपत्यका विकास प्राधिकरण, दिव्येश्वरी जग्गा एकीकरण आयोजना, भक्तपुरमा कार्यरत एक सब–इन्जिनियरविरुद्ध भ्रष्टाचार मुद्दा दायर भएको छ ।
अख्तियार दुरुपयोग अनुसन्धान आयोगले विशेष अदालतमा सब–इन्जिनियर कुमार पौड्यालविरुद्ध आइतबार भ्रष्टाचार मुद्दा दायर गरेको हो ।
पौड्यालले पदीय मर्यादा विपरीत कार्यहरू गरी ३ करोड ६३ लाख २१ हजार रुपैयाँ गैरकानुनी सम्पत्ति आर्जन गरी भ्रष्टाचार गरेको आरोपमा अख्तियार दुरुपयोग अनुसन्धान आयोगले आइतबार विशेष अदालतमा मुद्दा दायर गरेको हो ।
पौड्यालले २०५१ वैशाख ९ गतेदेखि २०८० असार ३१ गतेसम्मको अवधिमा सो बराबर रकम भ्रष्टाचार गरेको आरोप अख्तियारको छ ।
३ करोड ६३ लाख रुपैयाँ ऋणात्मक रही गैर कानुनी रूपमा सम्पत्ति आर्जन गरेको पुष्टि भएकाले पौड्याललाई साबिक भ्रष्टाचार निवारण ऐन, २०१७ को दफा १५ र प्रचलित भ्रष्टाचार निवारण ऐन, २०५९ को दफा २० को उपदफा (१) बमोजिम सजायको माग दाबी अख्तियारले गरेको छ ।
पौड्यालले गैर कानुनी रूपमा आर्जन गरेको सम्पत्ति श्रीमती विष्णुमैयाँ पौड्यालको नाममा पनि राखेको भेटिएकाले विष्णुमैयाँलाई पनि सम्पत्ति जफत प्रयोजनार्थ प्रतिवादी बनाइएको छ ।
प्रतिक्रिया