बुटवल । सहकारी ठगी प्रकरणमा पुर्पक्षका लागि थुनामा रहेका रवि लामिछानेले बिगो बराबरको धरौटी रकम बुझाएर रिहा हुन गरेको प्रयास विफल भएको छ ।
रुपन्देही जिल्ला अदालतले सोमबार रवि लामिछानेको निवेदनमाथि सुनुवाइ गर्दै ‘माग बमोजिम नहुने’ आदेश गरेको हो । जिल्ला न्यायाधीश नारायण प्रसाद सापकोटाको इजलासले रविलाई थुनामुक्त गर्न अस्वीकार गरेको हो ।
राष्ट्रिय स्वतन्त्र पार्टीका सभापतिसमेत रहेका लामिछानेले सुप्रिम सहकारी ठगी अभियोगमा आफूमाथि कायम गरिएको बिगो बमोजिम धरौटी रकम बुझाएर रिहा हुन मागसहित निवेदन दिएका थिए ।
जिल्ला अदालतले उक्त निवेदनमा ‘माग बमोजिम नहुने’ आदेश गरेसँगै रवि पक्षका कानुन व्यवसायी भने उच्च अदालतमा पुनरावेदन गर्ने तयारीमा छन् ।
रवि लामिछानेकै पक्षबाट अदालतमा बहस गरेका अधिवक्ता महेन्द्र पाण्डेले जिल्ला अदालतको निर्णयमाथि पुनरावेदनका लागि उच्च अदालतमा जाने बताए । रातोपाटीसँग कुरा गर्दै पाण्डेले भने, ‘भर्खरै जिल्ला अदालतको आदेश आएको छ । जिल्ला अदालतको आदेश चित्त नबुझे स्वाभाविक रूपमा पुनरावेदन हुन्छ नै । हामी छलफलमा छौँ । सम्भवतः एक हप्तापछि उच्च अदालतमा पुनरावेदन लिएर जान्छौँ ।’




















प्रतिक्रिया