Logo

प्रमुख समाचार

यी हुन् विधान महाधिवेशनमा मत दिन नपाउने एमाले नेताहरु



काठमाडौं । नेकपा एमालेका केही केन्द्रीय नेताहरुले विधान महाधिवेशनमा सहभागी हुन पाएतापनि मतदान प्रक्रियामा भने भाग लिन नपाउने भएका छन् । एमालेले यसअघि नै गरेको निर्णयका कारण एकता प्रक्रियाबाट आएका र पछि मनोनीत भएका नेताहरू मतदान प्रक्रियामा सामेल हुन नपाउने भएका हुन् ।

एमालेले दसौँ राष्ट्रिय महाधिवेशनका प्रतिनिधिले मात्र मत दिने पाउने निर्णय गरेको छ । स्थायी समिति सदस्य काशीनाथ अधिकारी अनुसार महाधिवेशन हलभित्र २१२८ प्रतिनिधि र आयोजक गरि २३९२ जना सहभागी हुँदैछन् । जसमा २१२८ प्रतिनिधिले मात्र मतदान प्रक्रियामा भाग लिन पाउने उनले बताए ।

महाधिवेशनको मतदान प्रक्रियामा भाग लिन नपाउनेहरुमा पूर्वराष्ट्रपति विद्यादेवी भण्डारी, मुकुन्द न्यौपाने, विभिन्न पार्टीबाट एमाले प्रवेश गरेका जितेन्द्रनारायण देव, प्रेमबहादुर सिंह, सुभाष कर्माचार्य, कुन्दन कुसवाह, ठम्मरबहादुर विष्टसहित २६४ जना रहेका छन् ।

पूर्व राष्ट्रपति भण्डारीलाई एमालेले सदस्यता नविकरण नगरेर पार्टीमा फर्किने बाटो नै बन्द गरिदिएको छ । सक्रिय राजनीतिमा आउने उद्घोष गरेलगत्तै एमालेले उनलाई रोक्न नै उनको सदस्यता नै खारेज गरिदिएको थियो ।

मुकुन्द न्यौपाने नेकपा एमालेका स्थायी कमिटी सदस्य हुन् । उनी एकीकृत समाजवादी पार्टी परित्याग गर्दै एमाले प्रवेश गरेको दुई वर्ष नाघिसक्यो । उनलाई भित्र्याउन एमालेले विधान नै संशोधन गरेर उमेर हद हटाएको थियो । तर, उनै न्यौपानेले भदौ २० गतेबाट सुरु हुने विधान महाधिवेशनमा मतदान प्रक्रियामा सहभागी हुन पाउने छैनन् ।

प्रेमबहादुर सिंह पनि यसपटकको विधान महाधिवेशनमा मत दिन नपाउने अर्का नेता हुन् । दशौं महाधिवेशन भएको चार महिनापछि जसपाबाट एमालेमा समाहित सिंहलाई एमालेले एक वर्षअघि मात्र केन्द्रीय सदस्य मनोनीत गरेको हो ।

त्यस्तै केन्द्रीय सदस्य ठम्मरबहादुर विष्टले पनि विधान महाधिवेशनमा मत दिन पाउने छैनन् । तत्कालीन माओवादी केन्द्रबाट कर्णाली प्रदेश सभा सदस्य रहेका विष्ट २०७८ चैत ६ गते एमाले भित्रिएका हुन् । त्यसपछि उनलाई एमालेले केन्द्रीय कमिटीमा ल्याएको हो ।

नेता जितेन्द्रनारायण देव पनि यसपटक विधान महाधिवेशनमा हुने मतदान प्रक्रियामा सहभागी हुन पाउने छैनन् । राष्ट्रिय सभाको कार्यकाल सकिएपछि २०८१ असार १७ गते एमाले प्रवेश गरेका उनी केन्द्रीय सदस्य मनोनित भएका छन् ।

यसैगरी, माओवादीका केन्द्रीय सदस्य एवं दाङका इन्चार्ज रहेका जीवन गौतम पनि २०७९ असार १० गते एमाले प्रवेश गरे ।
स्थानीय तहको चुनावमा मेयरको टिकट नपाएपछि रूष्ट भएका उनी एमाले केन्द्रीय कमिटी सदस्य छन्।

यता, सिन्धुपाल्चोकका चर्चित नेता सुभाष कर्माचार्य पनि २०८० साउन २० गते एमाले प्रवेश गरेर केन्द्रीय सदस्य बने । तर, उनी पनि विधान महाधिवेशनमा मत दिन नपाउने अर्का नेता हुन् ।

प्रकाशित मिति : २ भाद्र २०८२, सोमबार ०९:२७   :  बजे

810
Shares

अनलाइनपाना डटकममा प्रकाशित सामग्रीबारे कुनै सूचना, गुनासो, तथा सुझाव भए हामीलाई onlinepana@gmail.com मा लेखी पठाउनुहोला ।