काठमाडौं । नेपाली कांग्रेसको १५औँ महाधिवेशनमा युवाको उल्लेख्य सहभागिता देखिएको छ । महाधिवेशनमा सहभागी युवाहरूले ‘जेन्जी’ पुस्ताका युवा राष्ट्रिय स्वतन्त्र पार्टी (रास्वपा)मा मात्रै आबद्ध छन् भन्ने बुझाइ गलत भएको बताएका छन् । उनीहरूले आगामी दिनमा ठूलो संख्यामा युवा नेपाली कांग्रेसतर्फ आकर्षित हुने दाबी गर्दै केही समयमै मुलुक कांग्रेसमय बन्ने बताएका छन् ।
महाधिवेशनमा सहभागी हुन पूर्वदेखि पश्चिमसम्मका नेता, कार्यकर्ता तथा समर्थक काठमाडौंमा भेला भएका छन् । विभिन्न जिल्लाबाट आएका कांग्रेस कार्यकर्ता खुलामञ्चमा आपसमा भेटघाट गर्दै राजनीतिक विषयमा छलफल तथा बहसमा व्यस्त देखिएका छन् ।
महाधिवेशनस्थलमा पार्टीको आगामी नेतृत्व, नीति तथा राजनीतिक भविष्यबारे कार्यकर्ताबीच छलफल भइरहेको छ । लामो समयपछि एकै ठाउँमा भेला भएका नेता तथा कार्यकर्ताबीच आपसी भेटघाट र कुराकानीले महाधिवेशनस्थलमा उत्साहपूर्ण वातावरण देखिएको छ ।
महाधिवेशनमा युवादेखि ज्येष्ठ नागरिकसम्मको सहभागिता देखिएको छ । अपाङ्गता भएका व्यक्तिहरूको समेत सहभागिता रहेको छ । खुला आकाशमुनि चर्को घामका बाबजुद उनीहरू महाधिवेशनमा उत्साहपूर्वक सहभागी भइरहेका छन् ।
पार्टी नेतृत्व चयन, आगामी राजनीतिक दिशा र कांग्रेसको भूमिकालाई लिएर सहभागीहरूबीच चासो देखिएको छ । विशेषगरी युवा प्रतिनिधि तथा समर्थकहरू कांग्रेसभित्र पुस्तान्तरण, नेतृत्व र नयाँ राजनीतिक एजेन्डाबारे छलफलमा केन्द्रित देखिन्छन् ।
महाधिवेशनका गतिविधिलाई समाचार तथा प्रत्यक्ष प्रसारणमार्फत बाहिर ल्याउन विभिन्न सञ्चारमाध्यमका पत्रकार पनि सक्रिय छन् । खुलामञ्चमा राजनीतिक बहससँगै नेता, कार्यकर्ता र समर्थकको भेटघाट तथा अन्तरक्रियाले महाधिवेशनको माहोल थप चलायमान बनेको छ ।
प्रतिक्रिया