१६ वर्षमै छोरीको विवाह गर्न पाउं भन्दै आमाहरुले बुझाए प्रधानमन्त्रीलाई ज्ञापनपत्र

२० वर्ष उमेर नपुगी बिवाह गर्नु गराउनु कानुनी रुपमा अपराध मानिन्छ तर छोरीको विवाह १६ वर्षमै गर्न पाउ भन्ने केही महिलाहरुले माग गरेका छन् ।

बाँकेको नेपालगञ्जमा छोरीको विवाह १६ वर्षमै गर्न पाउनु पर्ने भन्दै महिलाहरुले जिल्ला प्रशासन कार्यालयमा धर्ना समेत दिएका छन् । मधेसी समुदायका केही महिलाहरूले १६ वर्षमै छोरीको विवाह गर्न पाउनुपर्ने माग गर्दै प्रशासन धाउन थालेको एक महिना भइसकेको प्रमुख जिल्ला अधिकारी मदन भुजेलले जानकारी दिए ।

उनका अनुसार २० वर्षमा छोरीको विवाह गर्दा विवाहपछि दुई वर्ष माइतमा बस्ने आफ्नो चलन मान्न नसकिने भन्दै उनीहरूले १६ वर्षमै छोरीको विवाह गर्न माग गरेका हुन । २० वर्षसम्म विवाह नगर्दा छोरीचेलीहरू आफैंले विवाह गर्छन् र ढिला बिहे भयो भने आफूहरूलाई नै छोरीको लागि वर खोज्न अप्ठ्यारो हुने भन्दै उनीहरूलेप्रमुख जिल्ला अधिकारी भुजेलमार्फत् प्रधानमन्त्री केपी शर्मा ओलीलाई ज्ञापनपत्र पनि बुझाएको उनले बताए ।

भुजेलले भने, ‘उनीहरूको मुख्य माग अहिलेको कानुन संशोधन होस् र आफूहरूलाई कारबाही नहोस् भन्ने छ । उनले कानुनको पालना सबैले गर्नु पर्ने, नगरे दोषीलाई कानुनअनुसार कारबाही हुने बताउँदै ऐन संशोधनबारे पठाइएको ज्ञापनपत्र प्रधानमन्त्री कार्यालयमा पठाइसकेको बताएका छन् ।

यो पनि पढ्नुहोस्

सुदूरपश्चिम प्रदेस सरकारले “सानै छुँ म बढ्न देऊ, बाल विवाह होइन पढ्न देऊ“ अभियान चलाउने

सुदूरपश्चिम प्रदेश सरकारले बाल विवाह अन्त्य गर्ने उद्देश्य सहित “सानै छु म बढ्न देउ, बाल विवाह होइन पढ्न देऊ“ अभियान सञ्चालन गर्ने भएको छ । प्रदेश सरकारले आज ल्याएको अगमाी आर्थिक वर्षको बजेटमा उक्त अभियान सञ्चालन गर्ने घोषणा गरेको हो ।

सरकारले प्रदेशसभा सदस्य, स्थानीय तहका पदाधिकारी, सामाजिक संघ संस्था, आमा समूह, बाल क्लब समेतको संलग्नतामा अभियान सञ्चालन गरिने जनाएको छ । नमूनाको रुपमा बाजुरा र दार्चुला जिल्लाबाट अभियान सुरु गरिने बजेट वक्तव्य उल्लेख गरिएको छ । अभियानका लागि आवश्यक बजेटको व्यवस्था गरिएको अर्थमन्त्री झपट बहादुर बोहोराले जनाए ।