बाल मन्दिरलाई सनराइज बैंकको आर्थिक सहयोग

सनराइज बैंकले आफ्नो १४ औं वार्षिकोत्सवको अवसरमा संस्थागत सामाजिक उत्तरदायित्व अन्तर्गत बाल मन्दिरलाई सहयोग गरेको छ । बैंकका प्रमुख कार्यकारी अधिकृत सुमन शर्माले नेपाल बाल संगठन बाल मन्दिरका अध्यक्ष विद्या उपाध्याय न्यौपानेलाई सहयोग रकम बराबरको चेक हस्तान्तरण गरे ।

बैंकले विगतमा बाल मन्दिरलाई आवश्यक खाद्य सामाग्री, लत्ताकपडा आदि वितरण गर्दै आएकोमा यसवर्ष आउँदै गरेको दसैंमा बालबालिकाको लागि नयाँ कपडा किन्नको लागि नगद एक लाख ५० हजार रुपैयाँ आर्थिक सहयोग गरेको हो । बाल हेरचाह, अनाथ, पिछडिएको, द्वन्द्व प्रभावित आदि बच्चाहरूको लागि शिक्षामा केन्द्रित सो संस्थालाई आउँदा वर्षमा पनि सहयोग गर्दै जाने प्रमुख कार्यकारी अधिकृत शर्माले बताए ।

साथै बैंकको गण्डकी प्रदेश कार्यालयको अगुवाइमा गण्डकी प्रदेश सरकारका शिक्षा संस्कृति विज्ञान र सामाजिक विकासमन्त्री मेखलाल श्रेष्ठको सहभागितामा अमोर सेवा नेपाललाई नगद र खाद्य सामाग्री वितरण गरेको छ । बैंकको लुम्बिनी प्रदेशबाट वीरेन्द्र मावि रुपन्देहीको दृष्टि बिहिन संकायको भवन निर्माणको लागि पनि आर्थिक सहयोग गरेको छ ।

यसैगरी, बैंकको बीरगंज शाखाको सहभागितामा विश्व डाँडामा र बैंकको लम्की शाखा, भजनी शाखा र टीकापुर शाखाको सहभागितामा टीकापुरको शिव मन्दिर सरसफाई गरेको जनाएको छ ।