उपत्यकाका तीन जिल्लामा आजदेखि लागू हुने गरी जेठ १३ गतेसम्म निशेधाज्ञा थप भएको छ । काठमाडौं सहित ललितपुर र भक्तपुर गरी तीन जिल्लामा निषेधाज्ञा थप भएको हो ।
उपत्यकाका तीन प्रमुख जिल्ला अधिकारीहरुको बैठकले गत बैशाख १६ गतेदेखि लागू हुने गरी पहिलो पटक र २३ गतेबाट लागू हुने गरी दोश्रो पटक निषेधाज्ञा जारी गरेको थियो भने तेश्रो पटक १५ दिन थप गरिएको छ ।
पहिलेभन्दा यस पटकको निषेधाज्ञामा थप कडाइ गरिएको छ । सङ्क्रमण दर झन् बढेपछि पुनः थप गरिएको निषेधाज्ञाको अवधिभर अत्यावश्यक बाहेक कार्यालय बन्द रहने प्रशासनले जनाइएको छ । काठमाडौंका प्रमुख जिल्ला अधिकारी कालीप्रसाद पराजुलीका अनुसार कोभिड–१९ को जोखिम बढ्दो क्रममा रहेकाले निषेधाज्ञाको अवधिभर त्यस्ता कार्यालय बन्द रहने जनाइएको छ । अत्यावश्यक सेवाका कार्यालयलाई सेवा प्रवाहमा कुनै व्यवधान आउन नदिइ न्यूनतम जनशक्तिमा सेवा प्रवाहको व्यवस्थापन गर्न पराजुलीद्वारा जारी विज्ञप्तिमा भनिएको छ ।
अब अत्यावश्यक खाद्य सामग्री खरिद बिक्रीका लागि बिहान १० बजेसम्म खुला रहने भएको छ। उक्त समयमा अत्यावश्यक खाद्य सामग्रीका पसल, व्यवसाय र डिपार्टमेन्टल स्टोर्स (खाद्य सामग्री मात्र बिक्री गर्न) खुला हुने छ। मानिसका भिडभाड हुने सबै गतिविधिमा रोक लगाइएको छ।
सर्वसाधारणले औषधि, खाद्यवस्तु, तथा अन्य अत्यावश्यक उपभोग्य वस्तु वा सेवा खरिदका लागि तथा अत्यावश्यक सेवा लिनुपर्दा बाहेक कुनै पनि व्यक्ति घर बाहिर निस्किन पाउने छैनन्। सार्वजनिक एवम् निजी सवारी साधन जेठ १३ गते राति १२ बजेसम्म उपत्यकामा सञ्चालनमा रोक लगाइएको छ ।
अत्यावश्यक सामग्री बोकेका ढुवानीका सवारी साधन, बिरामी तथा कुरुवा (बढीमा २ जना) बोकेका एम्बुलेन्स, स्वास्थ्यकर्मी तथा सुरक्षाकर्मीले प्रयोग गर्ने सवारी साधन सञ्चालन गर्न पाइने छ ।
विवाह, ब्रतबन्ध होटल तथा पार्टी प्यालेसमा गर्न रोक लगाइएको छ । घरमै उक्त कार्य गर्दा दश जनाभन्दा बढी उपस्थित हुन नपाइने आदेशमा भनिएको छ ।
प्रतिक्रिया